खारघर, ता. ७ (बातमीदार) : सिडकोतील सेवानिवृत्त कर्मचाऱ्यांसाठी सिडकोकडून खारघरमध्ये स्पोर्टस् क्लब उभारण्यात येणार आहे. सिडकोकडून जागेची निवड करण्यात आली असून क्लब बांधकामासाठी लवकरच निविदा काढण्यात येणार असल्याचे एका वरिष्ठ अधिकाऱ्यांनी ‘सकाळ’ला सांगितले.
मुंबई शहरावरील लोकसंख्येचा ताण कमी करण्यासाठी राज्य राज्य सरकारने १९७० साली सिडकोची (शहर औद्योगिक विकास मंडळ) स्थापना केली. सिडको अस्तिवात आल्यानंतर जवळपास ५० वर्षांत सिडकोमध्ये अनेक कर्मचारी सेवानिवृत्त झाले आहेत. अनेक वर्षे सेवा केलेल्या सेवानिवृत्त कर्मचाऱ्याचे आरोग्य, तसेच त्यांच्याबद्दल सामाजिक बांधिलकी असावी, विविध खेळ खेळता यावे, यासाठी खारघर सेक्टर पाचमधील भूखंड क्रमांक ४६ अ या जागेवर स्पोर्टस् क्लब उभारला जाणार आहे. क्लबच्या माध्यमातून सिडकोमध्ये अनेक वर्षे सेवा केलेले कर्मचारी एकत्र येणार असल्यामुळे सेवानिवृत्त कर्मचारी समाधान व्यक्त करीत आहेत. याविषयी जनसंपर्क अधिकारी प्रिया रातांबे यांच्याशी संपर्क केला असता होऊ शकला नाही.
----------------
४० कोटींचा खर्च
स्पोर्टस् क्लबमध्ये व्हॉलीबॉल, टेनिस आदी विविध खेळ, तसेच तरण तलाव (स्विमिंग पूल) असणार आहे. मिळालेल्या माहितीनुसार हा क्लब उभारण्यासाठी सिडको जवळपास ४० कोटींहून अधिक खर्च करणार असल्याचे समजते. सिडकोने खारघर सेक्टर पाचमधील भूखंड क्रमांक ४६ अ हा भूखंड उद्यानासाठी राखीव ठेवला होता; मात्र हा भूखंड वसाहतीपासून दूर असल्यामुळे या मैदानाची निवड स्पोर्टस् क्लबसाठी केल्याचे समजते.