बाळगंगा प्रकल्‍पग्रस्‍तांच्या यादीत इतरांची नावे
पेण, ता. ८ (वार्ताहर) : पेण तालुक्यातील बाळगंगा धरणाच्या प्रकल्पांतर्गत संकलन रजिस्टरनुसार अंतिम यादी तयार करण्यात आली आहे. यामध्ये इतरांची नावे समाविष्ट केल्याची तक्रार येथील प्रकल्पग्रस्त अनुप गायकवाड यांनी प्रांताधिकारी तसेच पंचायत समिती गटविकास अधिकारी यांच्याकडे केली आहे.
नवी मुंबईसाठी तालुक्याच्या वरसई विभागात बाळगंगा धरणाची निर्मिती करण्यात आली. यातील प्रकल्पअंतर्गत भूखंड वाटपाबाबत संयुक्त मोजणी २०१९ रोजी करण्यात आली. दरम्यान, संकलन रजिस्टरनुसार जी अंतिम यादी तयार झाली, मात्र यामध्ये मूळ प्रकल्‍पग्रस्‍तांचे नाव नसून अन्य व्‍यक्‍तींची नावे टाकण्यात आल्याचा आरोप प्रकल्पग्रस्त अनुप गायकवाड यांनी केला आहे. त्‍यानुसार गायकवाड यांनी प्रांताधिकारी तसेच पंचायत समिती गटविकास अधिकारी यांना निवेदन दिले आहे, तर तक्रारदाराने केलेला अर्ज हाताळला असून, त्याबाबत पंचायत समितीचे गटविकास अधिकारी आणि ग्रामसेवक यांच्याकडून अहवाल मागविण्यात येत आहे. हा अहवाल आल्यानंतर याबाबत पुढील योग्य तो निर्णय घेण्यात येऊन त्यात दोषी आढळल्यास त्यांच्यावर कारवाई करण्यात येईल, असे आश्वासन पेणचे प्रांताधिकारी प्रवीण पवार यांनी दिले आहे.