नवी मुंबई, ता. ८ (वार्ताहर) : खारघर सेक्टर २८मधील रांजणपाडा येथे विनापरवाना देशी बनावटीचे गावठी पिस्तूल व जिवंत काडतूस घेऊन आलेल्या तरुणाला खारघर पोलिसांनी बुधवारी (ता. ७) रात्री अटक केली आहे. मन्नान गुड्डु शेख (१९) असे या तरुणाचे नाव असून पोलिसांनी त्याच्याजवळ असलेले पिस्तूल आणि मॅगझीनसह चार जिवंत काडतुसे जप्त केली आहेत.
खारघर सेक्टर २८मधील रांजणपाडा येथील स्मशानभूमीजवळ एक व्यक्ती देशी बनावटीचे पिस्तूल घेऊन येणार असल्याची माहिती खारघर पोलिसांना मिळाली होती. त्यानुसार वरिष्ठ पोलिस निरीक्षक दीपक सुर्वे यांच्या मार्गदर्शनाखालील पथकाने बुधवारी रात्री रांजणपाडा येथील स्मशानभूमीजवळ पाळत ठेवली होती. रात्री साडेआठ वाजण्याच्या सुमारास त्या ठिकाणी मन्नान शेख हा तरुण संशयास्पदरीत्या आढळून आल्यानंतर पोलिसांनी त्याला ताब्यात घेऊन त्याची झडती घेतली. या वेळी त्याच्याजवळ देशी बनावटीचे पिस्तूल आणि चार जिवंत काडतुसे आढळून आली. त्यामुळे पोलिसांनी त्याच्याजवळ सापडलेले पिस्तूल व जिवंत काडतुसे जप्त करून चौकशी केली असता, त्याने कोणतीही समाधानकारक उत्तरे दिली नाहीत. त्यानंतर पोलिसांनी त्याच्यावर गुन्हा दाखल करून त्याला अटक केली.