मुरबाड, ता. ११ (बातमीदार)ः शहरातील पथदिवे गेल्या चार महिन्यांपासून नादुरुस्त अवस्थेत आहेत. स्थानिकांकडून याबाबत सातत्याने नगर पंचायतीकडे तक्रारी करण्यात येत आहेत. त्यानुसार पावसाळ्यापूर्वी दुरुस्तीची कामे पूर्ण करण्यात येणार असल्याने मुरबाड लखलखणार आहे.
शहरांमध्ये अनेक ठिकाणी पथदिवे बंद पडल्याच्या नागरिकांच्या तक्रारी होत्या. पथदिवे दुरुस्तीसाठी नगर पंचायतीतर्फे हायड्रोलिक शिडी असणारे वाहन नुकतेच खरेदी करण्यात आले आहे. आमदार किसन कथोरे यांचे हस्ते या वाहनाचे लोकार्पण करण्यात आले होते; मात्र या वाहनासाठी चालक मिळत नसल्याने उपयोग केला जात नसल्याचे नगर पंचायतीचे कर्मचारी सांगतात. त्यामुळे शिडीचा वापर करून कर्मचारी खांबावर चढत आहेत. पथदिव्यांसंबंधी तक्रारीसाठी नगर पंचायतीच्या कर्मचारी वैशाली देशमुख यांच्याकडे संपर्क साधण्याचे आवाहन नगर पंचायतीमार्फत करण्यात आले आहे; परंतु दिलेल्या क्रमांकावरून प्रतिक्रिया दिली जात नसल्याने मुरबाडकरांमध्ये नाराजीचा सूर आहे.
-------------------------------
नगर पंचायतीकडून कामाला सुरुवात
मुरबाड शहरात ज्या ठिकाणी पथदिवे नादुरुस्त झाले आहेत त्या ठिकाणी नवीन दिवे बसवण्याचे काम सुरू झाले आहे. त्यासाठी लागणारे साहित्य मागवण्यात आले असल्याचे मुरबाड नगर पंचायतीचे मुख्याधिकारी मनोज म्हसे यांनी सांगितले.
----------------------------------------
मुरबाड शहरात अनेक ठिकाणी पथदिवे नादुरुस्त आहेत. नवीन पद्धतीने बसवण्याचे काम सुरू करण्यात आले आहे. पावसाळ्यापूर्वी शहरात सर्व ठिकाणी पथदिवे बसविण्याचे काम पूर्ण करण्यात येईल.
- संतोष चौधरी, नगराध्यक्ष, मुरबाड नगर पंचायत