पदपथावर दुकानदारांचा कब्जा
मालाड, ता. १२ (बातमीदार) ः मालाड रेल्वेस्थानकासमोरील रस्ता रुंदीकरण झाले, मात्र पदपथावर अतिक्रमण झाले. यामुळे पादचाऱ्यांना हक्काच्या पदपथाचा वापर करता येत नाही.
मालाड पश्चिमेतील स्थानकालगतच्या रस्त्याचे रुंदीकरण पालिकेने केले आणि काही दुकानांवर कारवाई करत रस्ता मोठा केला. तसेच पुन्हा अतिक्रमण होऊ नये म्हणून पालिकेने रस्त्यालगत पदपथ बनवले, मात्र या पदपथाचा उपयोग पादचाऱ्यांना करता येत नाही, कारण या पदपथावर लगतच्या दुकानांनी तसेच हॉटेलने अतिक्रमण करून फेरीवाल्यांना धंदा लावण्यासाठी दिले आहे आणि त्याचे भाडे अनधिकृतपणे दुकानदार आणि हॉटेलमालक वसूल करत आहेत. तसेच यातील काही रक्कम पालिका कर्मचाऱ्यांनाही देत असल्याचे आरोप होत आहेत.
एकीकडे फेरीवाल्यांवर कठोर कारवाई होत असताना दुसरीकडे निर्धास्तपणे दुकानदार आणि हॉटेलचालक पदपथावर अतिक्रमण करून त्यातून उत्पन्न मिळवत आहेत. तसेच या पदपथावर दुकानदारांनी अतिक्रमण केल्याने पादचाऱ्यांना रस्त्यावरून ये-जा करणे भाग पडत असल्याने वाहतूक कोंडीत भर पडत आहे. वाहतूक सुरळीत करण्याच्या उद्देशाने पालिकेने रस्ता रुंद करून पदपथ पादचाऱ्यांसाठी बनवले, मात्र त्याचा उपयोग सामान्यांऐवजी दुकानदारांनाच अधिक होत असल्याचे येथे दिसते आहे.