वासिंद, ता.१४ (बातमीदार): परिसरात भटक्या कुत्र्यांनी धुमाकूळ घातला आहे. पण ग्रामपंचायतीकडे स्वतंत्र यंत्रणा नसल्याने ग्रामस्थांसाठी ही समस्या अधिकच त्रासदायक ठरत असल्याने मनसे कार्यकर्त्यांनी गटविकास अधिकाऱ्यांकडे भटक्या कुत्र्यांचा बंदोबस्त करण्याची मागणी केली आहे.
भटक्या कुत्र्यांच्या गंभीर प्रश्नावर ग्रामपंचायत स्तरावर कोणतीही ठोस कारवाई झालेली नाही. याबाबतचे वृत्त ‘सकाळ’ मध्ये प्रकाशित झाल्यानंतर पशुधन अधिकाऱ्यांनी ग्रामपंचायतीला नसबंदी नियंत्रण कार्यक्रम तसेच भटक्या कुत्र्यांचे लसीकरणाच्या सूचना केल्या. पण यासाठीची यंत्रणा नसल्याने ग्रामपंचायतीने कुत्र्यांच्या बंदोबस्तासाठी भिवंडी महापालिका, शहापूर नगरपंचायतीकडे मदत मागितली. परंतु, आजपर्यंत कोणताही प्रतिसाद मिळालेला नसल्याने मनसेचे वासिंद शहर अध्यक्ष अमोल बोराडे यांनी शहापूर पंचायत समितीच्या गट विकास अधिकाऱ्यांना निवेदन दिले आहे. यावेळी भिवंडी लोकसभा सचिव राकेश वारघडे, ज्येष्ठ कार्यकर्ते चंदू भोईर, शहापूर तालुका उपाध्यक्ष हर्षल अस्वले, शहर उपाध्यक्ष कुणाल पांडव उपस्थित होते.
--------------------------------------------
श्वानदशांच्या घटनांमध्ये वाढ
वासिंद गावात परिसरातील बाजारपेठेत खरेदीसाठीची लगबग तसेच नोकरी धंद्यानिमित्त येणाऱ्यांची वर्दळ अधिक असते. अशातच भटके कुत्रे अंगावर धावून जाणे, चावणे असे प्रकार वारंवार घडत आहेत. परंतु, ग्रामपंचायत उपाययोजना करण्याबाबत गंभीर नसल्याने श्वानदशांच्या घटना वाढत आहेत.