गौरापुरात वादळी वाऱ्याने २४ घरांची पडझड
वाडा, ता. १६ (बातमीदार) ः तालुक्यात सतत पडत असलेल्या अवकाळी पावसाने नागरिकांची त्रेधातिरपीट उडवली आहे. गुरुवारी (ता. १५) सायंकाळी वादळी वाऱ्यासह जोरदार पाऊस बरसला. या वाऱ्याने गौरापूर गावाला अक्षरशः झोडपले असून, सुमारे २४ घरांचे मोठे नुकसान झाले आहे. यामध्ये घरांचे छप्पर उडाले असून, नागरिकांचे गृहोपयोगी साहित्य भिजले आहे.
पुंडलिक उल्हास, उल्हास मथे, दत्तात्रय जाधव, मनोज पडवळे, हरी मोर, भरत मोर, भगवान मोर, नारायण जाधव, भिवा मथे, भारती पडवळे, दशरथ धापशी, जानू वणगे, कल्पेश जाधव, मंजुळा तांडेळ, अनिल मथे, बारकू मथे, शैलेश मथे, नंदू शेळके, वंदना मथे, संतोष मथे, नीलेश मथे अशी नुकसान झालेल्या नागरिकांची नावे आहेत.
मिळालेल्या माहितीनुसार, गुरुवार सायंकाळी झालेल्या वादळी वाऱ्याने एकाच गावपाड्यातील सुमारे २४ घरांचे छप्पर उडाली आहेत. यामुळे नागरिकांचे अन्नधान्य, कपडे भिजले असून, संसार उघड्यावर आले आहेत. दरम्यान, तलाठी मंडळ अधिकारी यांनी नुकसानीचे पंचनामे सुरू केले आहेत.
यासंदर्भात वाड्याचे तहसीलदार भाऊसाहेब अंधारे यांच्याशी संपर्क साधला असता नुकसानीचे पंचनामे करण्याचे काम सुरू असून, अहवाल तत्काळ वरिष्ठ कार्यालयाकडे पाठवला जाईल. गरजूंना सामाजिक संस्थेमार्फत अन्नधान्य पुरवण्यात आल्याची माहिती त्यांनी दिली.
वादळी वाऱ्याने आमची घरे उद्ध्वस्त झाली असून, सरकारने आम्हाला तत्काळ मदत करावी, अशी मागणी नीलेश मथे यांच्यासह नुकसानग्रस्तांनी केली आहे.