एटीएमच्या अदलाबदलीने तरुणाची ३४ हजारांच्या फसवणुकीसह दोघांना मारहाण; एकावर गुन्हा दाखल
भिवंडी, ता. १९ (वार्ताहर) ः पैसे काढण्यासाठी गेलेल्या तरुणाला दोन अज्ञातांनी बोलण्यात गुंतवून एटीएमची अदलाबदली करून ३४ हजार रुपयांची फसवणूक केली. तसेच त्याच्या काकासह मित्राला मारहाण केल्याची घटना समोर आली आहे. ही घटना वळगावच्या हद्दीतील अभ्युदय एटीएममध्ये घडली असून, याप्रकरणी एकाविरोधात नारपोली पोलिस ठाण्यात गुन्हा दाखल करण्यात आला आहे. विकी राजू वानखेडे (वय २४, रा. उल्हासनगर) असे गुन्हा दाखल झालेल्याचे नाव आहे.
पोलिसांनी दिलेल्या माहितीनुसार, १० एप्रिल रोजी राहुल सुगरीव शेवाळे हा अभ्युदय बँकेच्या एटीएममध्ये पैसे काढण्यासाठी गेला असता त्यास दोन टोपी घातलेल्या अनोळखी व्यक्तींनी बोलण्यात गुंतवून त्याच्या एटीएमची अदलाबदली केली आणि खात्यातून ३४ हजार ४० रुपये काढले होते.
याबाबत राहुलने सायबर क्राइमला शुक्रवारी (ता. १६) ऑनलाइन तक्रार नोंद केली होती, तर एटीएम फसवणुकीबाबत राहुल व त्याचे काका संतोष छबू निंगुळे यांनी सीसीटीव्ही कॅमेऱ्याचे फुटेज काढले होते. त्यानंतर संतोष हे त्याच एटीएममध्ये पैसे काढण्यासाठी १७ मे रोजी गेले असता त्यांना या ठिकाणी दोन संशयित व्यक्ती आढळून आले. दरम्यान, संशयितांचा पाठलाग करताना दोघांपैकी हरिदास याने संतोषला जोरात धक्का देऊन राजूला पळून जाण्यास सांगितल्याने संतोष व त्याचा मित्र विनायक यांनी विकीला पकडण्याचा प्रयत्न केला. त्या वेळी विकीने त्याच्याकडील लोखंडी पंचने संतोषच्या डोळ्याच्या बाजूला आणि मानेवर हल्ला केला. दरम्यान, संतोष यास वाचवण्यास गेलेल्या विनायकलाही विकीने लोखंडी पंचने मारून जखमी केले आहे, तर विनायकने मदतीसाठी पोलिसांना फोन करण्याचा प्रयत्न केला असताना विकीने फोन जमिनीवर आपटून फोडला. याप्रकरणी रविवारी (ता. १८) संतोषच्या फिर्यादीवरून विकीच्या विरोधात नारपोली पोलिस ठाण्यात गुन्हा दाखल केला आहे. पुढील तपास पोउनि भरत नवले करीत आहेत.