उल्हासनगर, ता. २१ (वार्ताहर) : एमएमआरडीएच्या कामांची धीम्या गतीने होत असलेली वाटचाल आणि रस्त्याच्या सुरक्षिततेकडे करण्यात येणारी अक्षम्य दुर्लक्षता यामुळे पुन्हा एकदा अपघाताची घटना समोर आली आहे. आशेळे-मानेरे मार्गावर सोमवारी रात्री एक दुचाकीस्वार तब्बल सहा फूट खोल नाल्याच्या खड्ड्यात पडून गंभीर जखमी झाला. ही घटना नागराणी महावितरण कार्यालयासमोरील रस्त्यावर घडली. रस्त्यावर कोणतीही सुरक्षा व्यवस्था किंवा सूचनाफलक नसल्याने अपघाताला खतपाणी मिळाल्याचे स्थानिकांचे म्हणणे आहे.
एक युवक सोमवारी रात्री साडेअकराच्या सुमारास दुचाकीवरून आशेळे गावाकडे जात असताना रस्त्याच्या मध्यभागी सुरू असलेल्या नाल्याच्या खोदकामाकडे लक्ष न गेल्याने थेट सहा फूट खोल खड्ड्यात कोसळला. स्थानिक नागरिकांनी तत्काळ मदत करत त्याला बाहेर काढले आणि उपचारासाठी रुग्णालयात दाखल केले. विशेष म्हणजे, हा रस्ता नागरिकांच्या वाहतुकीसाठी बंद करण्यात आला आहे. तरीही कुठलीही ठोस अडथळा व्यवस्था नसल्याने अनेक नागरिक अजूनही येथून जीव धोक्यात घालून प्रवास करत आहेत. एमएमआरडीएच्या ढिसाळ नियोजनावर आणि अपुऱ्या देखरेखीवर स्थानिकांनी तीव्र नाराजी व्यक्त केली आहे. या मार्गावर योग्य ती सुरक्षा यंत्रणा तातडीने राबवावी, रस्ते कामांच्या ठिकाणी स्पष्ट सूचनाफलक, रिफ्लेक्टर आणि अडथळे लावावेत, अशी मागणी नागरिकांतून होत आहे.