मुंबई सेंट्रल-राजकोट, गांधीधाम यादरम्यान सुपरफास्ट तेजस विशेष गाड्या
सकाळ वृत्तसेवा
मुंबई, ता. २४ : प्रवाशांची अतिरिक्त गर्दी लक्षात घेऊन पश्चिम रेल्वेने मुंबई सेंट्रल ते राजकोट आणि मुंबई सेंट्रल ते गांधीधाम यादरम्यान विशेष भाड्याने सुपरफास्ट तेजस विशेष गाड्या चालवण्याचा निर्णय घेतला आहे. याव्यतिरिक्त प्रवाशांच्या मागणीची पूर्तता करण्यासाठी पश्चिम रेल्वेने दोन जोड्या विशेष गाड्यांच्या फेऱ्या वाढवल्या आहे.
ट्रेन क्रमांक ०९००५/०९००६ मुंबई सेंट्रल-राजकोट तेजस सुपरफास्ट द्वि-साप्ताहिक विशेष गाडीच्या १८ फेऱ्या धावणार आहेत. ट्रेन क्रमांक ०९००५ मुंबई सेंट्रल-राजकोट विशेष दर बुधवार आणि शुक्रवारी मुंबई सेंट्रलहून रात्री ११.२० वाजता निघेल आणि दुसऱ्या दिवशी सकाळी ११.४५ वाजता राजकोटला पोहोचेल. ही ट्रेन ३० मे ते २७ जूनपर्यंत धावेल. त्याचप्रमाणे, ट्रेन क्रमांक ०९००६ राजकोट-मुंबई सेंट्रल विशेष दर गुरुवार आणि शनिवारी राजकोटहून सायंकाळी ६.३० वाजता निघेल आणि दुसऱ्या दिवशी सकाळी ०७.३० वाजता मुंबई सेंट्रलला पोहोचेल. ही ट्रेन ३१ मे ते २८ जूनपर्यंत धावेल. यासोबत ट्रेन क्रमांक ०९०१७/०९०१८ मुंबई सेंट्रल-गांधीधाम तेजस सुपरफास्ट साप्ताहिक विशेष गाडीच्या १० फेऱ्या धावणार आहेत.
ट्रेन क्रमांक ०९०१७ मुंबई सेंट्रल-गांधीधाम स्पेशल दर सोमवारी मुंबई सेंट्रलहून रात्री ११.२० वाजता निघेल आणि दुसऱ्या दिवशी दुपारी १२.५५ वाजता गांधीधामला पोहोचेल. ही ट्रेन २ जून ते ३० जूनपर्यंत धावेल. त्याचप्रमाणे, ट्रेन क्रमांक ०९०१८ गांधीधाम-मुंबई सेंट्रल स्पेशल दर मंगळवारी गांधीधामहून सायंकाळी ६.५५ वाजता निघेल आणि दुसऱ्या दिवशी सकाळी ७.३० वाजता मुंबई सेंट्रलला पोहोचेल. ही ट्रेन ०३ जून ते ०१ जुलै पर्यंत धावेल. दरम्यान, या गाड्यांचे आरक्षण आज रविवार २५ मेपासून सुरू होणार आहे.

या गाड्यांचा विस्तार
ट्रेन क्रमांक ०९०६७ उधना-जयनगर अनारक्षित स्पेशल २९ जूनपर्यंत वाढवण्यात आली आहे. ट्रेन क्रमांक ०९०६८ जयनगर-उधना अनारक्षित स्पेशल ३० जूनपर्यंत वाढवण्यात आली आहे. ट्रेन क्रमांक ०९०६९ उधना-समस्तीपूर स्पेशल २८ जूनपर्यंत वाढवण्यात आली आहे. ट्रेन क्रमांक ०९०७० समस्तीपूर-उधना स्पेशल ३० जूनपर्यंत वाढवण्यात आली आहे.