भुयारी गटारांच्या अपूर्ण कामांमुळे रस्त्यांची चाळण
खड्ड्यांमुळे अपघातांची मालिका सुरूच : ठेकेदाराचा हलगर्जीपणा
उल्हासनगर, ता. २६ (वार्ताहर) : शहरात सुरू असलेल्या भुयारी गटारांच्या अपूर्ण कामांमुळे रस्त्यांची चाळण झाली आहे. तसेच ड्रेनेज लाइनचे काम अपूर्ण असून, अनेक ठिकाणी खड्डे भरलेले नाहीत. त्यामुळे शहरात अपघातांचे प्रमाण दिवसेंदिवस वाढत आहे. सोमवारी (ता. २६) दुपारी उल्हासनगरच्या श्रीरामनगर सेक्शन २८ पुनम हॉटेलसमोर एका खडीने भरलेल्या ट्रकचा एक चाक रस्त्यातील खोल खड्ड्यात अडकला. यामुळे परिसरात वाहतुकीचा खोळंबा निर्माण झाला. रस्त्यावर वाहनांच्या रांगा लागल्याने नागरिकांनी संताप व्यक्त केला. विशेष म्हणजे हा अपघात नेमका त्याच ठिकाणी झाला जिथे काही महिन्यांपूर्वी ड्रेनेज लाइन टाकण्याचे काम करण्यात आले होते.

घटनेची माहिती मिळताच महापालिकेची यंत्रणा जागी झाली. तातडीने तीन जेसीबी मशीन घटनास्थळी दाखल झाल्या. अडकलेला ट्रक मोठ्या प्रयत्नांती बाहेर काढण्यात आला. सुमारे एक ते दीड तासानंतर वाहतूक पूर्वपदावर आली. या घटनेनंतर स्थानिक नागरिकांनी महापालिका आणि ठेकेदाराच्या दुर्लक्षित भूमिकेवर ताशेरे ओढले. काम झाल्यानंतर रस्ते व्यवस्थित बुजवले गेले असते, तर आजचा अपघात टळला असता. दरवर्षी हीच परिस्थिती का, असा सवाल संतप्त नागरिकांनी केला.