मामाच्या मुलासोबत लग्नाला विरोध केल्याने मुलीची आत्महत्या
सकाळ वृत्तसेवा
डोंबिवली, ता. २९ : मामाच्या मुलासोबत प्रेम असून त्याच्यासोबतच लग्न करायचे आहे, असा हट्ट धरला; मात्र मुलीच्या घरच्यांचा याला विरोध होता. या नाराजीतून एका १७ वर्षीय अल्पवयीन मुलीने राहत्या घरी आत्महत्या केली. मंगळवारी (ता. २७) दुपारी खांबाळपाडा परिसरात ही घटना घडली आहे. याप्रकरणी टिळकनगर पोलिस ठाण्यात आकस्मिक मृत्यूची नोंद केली आहे.
डोंबिवली पूर्वेतील खंबाळपाडा परिसरात मृत मुलीचे कुटुंब राहते. वडिलांनी पोलिसांना दिलेल्या माहितीनुसार १७ वर्षीय मुलगी ही गेल्या सहा महिन्यांपासून तिच्या मामाच्या मुलासोबत बोलत आहे. इन्स्टाग्राम आणि मोबाईलवर ते एकमेकांच्या संपर्कात होते. मुलीने कुटुंबांकडे हट्ट केला होता, की लग्न केले तर मामाच्या मुलाशीच करीन. घरच्यांनी तू अजून लहान आहेस सांगत त्या लग्नाला विरोध केला. यामुळे मुलगी नाराज होती. मंगळवारी वडील आणि भाऊ नेहमीप्रमाणे कामाला गेले. तर आई कपडे धुण्यासाठी बाहेर असताना मुलीने घरातील पंख्याला ओढणी बांधत गळफास लावून घेतला. आई घरात आली असता तिने मुलीला पाहताच तत्काळ शेजाऱ्यांना बोलावून मुलीला डोंबिवलीतील पालिकेच्या शास्त्रीनगर रुग्णालयात नेले. तेथे डॉक्टरांनी तपासणीनंतर मुलीला मृत घोषित केले.