भिवंडी, ता. ३१ (वार्ताहर)ः शहरातील काही भागांमध्ये तासभर पडलेल्या पावसातच पाणी साचल्याचे प्रकार घडले होते. या घटनांचे गांभीर्य लक्षात घेत आयुक्त अनमोल सागर यांनी गुरुवारी शहरातील नालेसफाईच्या कामाचा आढावा घेतला आहे.
शहरातील प्रभाग समिती क्रमांक चार येथील काकूबाई चाळ, आझमीनगर, मुख्य रस्त्यावरील टोरेंट ऑफिस येथील नाल्याची पाहणी केली, तर प्रभाग समिती क्रमांक दोनमधील गोपाळनगर, साईबाबा, रांजणोली नाका टाटा आमंत्रा येथील नाल्याची पाहणी केली. प्रभाग समिती क्रमांक एक व पाचमधील मेट्रो हॉटेलजवळ नाल्याची पाहणी केली. या वेळी पावसाळ्यात गोपाळनगर, कल्याण नाका, म्हाडा कॉलनी, चाविंद्रा नाका येथे पाणी भरण्याची शक्यता असते, अशा ठिकाणांना भेट देऊन पाणी साचणार नाही, याकरिता संबंधितांना सूचना दिल्या. या वेळी उपायुक्त (आरोग्य) विक्रम दराडे, शहर अभियंता जमील पटेल, बांधकाम अतिरिक्त शहर अभियंता सचिन नाईक, उपअभियंता (बांधकाम) हरेश म्हात्रे, आरोग्य विभागप्रमुख फैसल तातली, प्रभाग अधिकारी मकसुम शेख, गिरीष घोष्टेकर, बाळाराम जाधव, मुख्य आरोग्य अधिकारी जे. एम. सोनावणे, हरेष भंडारे उपस्थित होते.