भिवंडी, ता. १ (बातमीदार) ः शहरातील इस्लाम धर्मियांच्या बकरी ईद सणाला ७ जूनपासून सुरुवात होत आहे. या सणानिमित्त मुस्लिमबहुल भागांमध्ये हजारोंच्या संख्येने बोकडांची कुर्बानी दिली जाते. यासाठी लागणाऱ्या गवताच्या विक्रीतून आदिवासींना रोजगार मिळत आहे.
भिवंडीतील बकरी ईद सण ग्रामीण भागातील आदिवासी बांधवांसाठी आर्थिक उत्पन्न देणारा ठरत आहे. कारण इस्लाम धर्मियांकडून बकरी ईदनिमित्ताने १५ दिवस अगोदरपासून बोकड खरेदी केले जात आहेत. त्यांची सेवा करून त्यांची ईदच्या दिवशी कुर्बानी दिली जाते. यादरम्यान शहरात बोकड, रेड्यांच्या चाऱ्यासाठी लागणारे गवत, पेंढा आणि झाडांचा पाला विकून आदिवासींची चांगलीच कमाई सुरू आहे. शहरातील गल्ली-बोळात, मोहल्ल्यात जनावरांची विक्री केली जात आहे. शहरातील अवचितपाडा आणि खंडुपाडा येथे दरवर्षी हा बाजार भरतो. तर जनावरांना लागणाऱ्या चाऱ्याचा बाजार तीनबत्ती, कोटरगेट, चांदतारा मस्जिद, दर्गारोड आणि वंजारपट्टीनाका येथे असतो. या ठिकाणी ग्रामीण भागातील चिंबीपाडा, मीठपाडा, आनगाव, पाये आदी ठिकाणांहून आदिवासी गवत, पेंढा आणि झाडांचा पाला विक्रीसाठी आणतात.
------------------------------------------
पेंढ्यासाठी पन्नास रुपये
शहरातील जनावरांच्या खुल्या बाजारात ५० रुपयेप्रमाणे भाताच्या पेंढ्याची एक जुडी (मोदल) विकली जात आहे. तसेच कोटरगेट परिसरात चांदतारा मस्जिदजवळ १० ते २० रुपये जुडीप्रमाणे गवत, भाताचा पेंढा, शिदाचा आणि उंबराच्या झाडाचा पाला विक्री होत आहे. त्यामुळे सण कोणत्याही धर्माचा असो अनेकांसाठी त्यातून रोजगार उपलब्ध होत आहे.