केडीएमसी अधिकाऱ्यांनी केली पिसवली प्रभागाची पाहणी
शिवसेनेच्या अमित कोळेकर यांनी मांडल्या नागरी समस्या

कल्याण, ता. १ (वार्ताहर) : पिसवली प्रभागातील शिवसेनेचे पदाधिकारी तथा शिवसेना वैद्यकीय मदत कक्ष कल्याण ग्रामीण शहरप्रमुख अमित कोळेकर यांच्या पुढाकाराने नागरिकांच्या प्रश्नांची सोडवणूक करण्यासाठी शनिवारी (ता. ३१) विकासमय पाहणी दौऱ्याचे आयोजन केले होते. या पाहणी दौऱ्यात केडीएमसी सहाय्यक आयुक्त भारत पवार व इतर अधिकारी तसेच स्थानिक नागरिक उपस्थित होते.
पिसवली प्रभागातील शिवसेनेचे अमित कोळेकर यांनी कल्याण-डोंबिवली महानगरपालिकेचे सहाय्यक आयुक्त भारत पवार यांची भेट घेऊन प्रभागातील विविध प्रश्नांना वाचा फोडली व प्रभागामध्ये पाहणी दौरा करण्याचे निवेदन दिले होते. त्याला अनुसरून सहाय्यक आयुक्तांनीदेखील तत्काळ प्रतिसाद देत नागरिकांच्या प्रश्नांची सोडवणूक करण्यासाठी पाहणी दौरा केला.
त्या वेळी मोठ्या संख्येने नागरिक रस्त्यावर उतरलेले दिसले. या दौऱ्यामुळे प्रभागातील नागरिकांना एकप्रकारचा दिलासा मिळाला असून, तसेच आतापर्यंत कोणीही हा उपक्रम पिसवली प्रभागात राबवला नसून, अमित कोळेकर यांच्या माध्यमातून नागरिकांच्या प्रश्नांना वाचा फोडणारे नेतृत्व उदयास आले आहे, असा सूर नागरिकांकडून येताना दिसला.