ठाणे, ता. २ : आधुनिक सुरक्षा यंत्रणा असतानादेखील घरातून पावणेनऊ लाखांचे सोने-चांदीच्या दागिन्यांसह रोख रकमेवर चोरांनी डल्ला मारला आहे. याप्रकरणी वर्तकनगर पोलिस ठाण्यात गुन्हा दाखल करण्यात आला आहे.
सावरकरनगरातील टोनी मेशन बिल्डिंग सोसायटीच्या पाचव्या मजल्यावरील परमिंदर चोपडा यांच्या घरी शुक्रवारी (ता. ३०) रोजी चोरी झाली आहे. या वेळी अज्ञात चोरट्यांनी त्यांच्या बंद घराचे सेफ्टी डोअर आणि आतील दरवाजाचे कुलूप तोडून दिवसाढवळ्या घरात प्रवेश केला. तसेच घरातील लाकडी कपाटाचे लॉकर तोडून सोन्याचे-चांदीचे दागिने असलेला डबा घेऊन पोबारा केला. या वेळी चोरट्याने रोख १० हजार रुपयांसह पावणेदोन लाखांचा नेकलेस, सव्वादोन लाखांच्या बांगड्यांचे चार नग, एक लाख तीस हजारांच्या सात सोन्याच्या अंगठ्या, एक लाखाच्या दोन सोन्याच्या चेन, ७८ हजारांच्या सोन्याचा एक नेकलेस, २५ हजारांचे कानातील झुमके, २५ हजारांची सोन्याची एक माग टीका, २२ हजारांचे सोन्याचे नाकातील नथ, २८ हजारांचे बदाम आकाराचे सोन्याचे पेंडल, सात हजारांचे बदाम आकाराचे सोन्याचे पेंडल, १० हजारांचे सोन्याचे दोन शिक्के, १० हजारांचे नाकातील मुरणी पाच नग, एक हजारांची चांदीची अंगठी, १५ हजारांचे चांदीचे पैंजण एक जोडी, तीन हजारांच्या पायाच्या बोटातील तीन जोडी जोडवे आणि १० हजारांचे चांदीचे १० शिक्के असा ऐवज चोरीला गेला आहे. याप्रकरणी वर्तकनगर पोलिस ठाण्यात गुन्हा दाखल आहे.