भिवंडी, ता. ५ (बातमीदार) : पुंडास-खालिंगमध्ये भांडणाच्या रागातून बदनामीचा मजकूर समाजमाध्यमांवर प्रसिद्ध करण्यात आला होता. याप्रकरणी बदनामी करणाऱ्या शेजाऱ्यावर न्यायालयात पाच लाखांचा अब्रूनुकसानीचा दावा दाखल केला आहे.
पुंडास-खालिंग गावात राहणारे दिनेश जाधव विधी शाखेत अंतिम वर्षाचे शिक्षण घेत आहेत. त्यांच्याबद्दल शेजारीच राहणाऱ्या मिलिंद जाधव यांनी
२३ मे रोजी झालेल्या भांडणाच्या रागातून बदनामीकारक मजकूर समाजमाध्यमांवर व्हायरल केला होता. याप्रकरणी दीपालीच्या फिर्यादीवरून मिलिंद जाधवसह त्याच्या कुटुंबीयांविरोधात गणेशपुरी पोलिस ठाण्यात गुन्हा दाखल करण्यात आला. याच रागातून मिलिंदने व्हॉट्सॲप ग्रुपवर दिनेश यांचा फोटो प्रसारित केला होता. त्यामुळे दिनेशने मिलिंदविरोधात पाच लाखांचा अब्रूनुकसानीचा दावा केला आहे.