कल्याणात प्लॅस्टिकबंदीसाठी पर्यावरण रॅली
कल्याण, ता. ५ (वार्ताहर) : महापालिका, प्रदूषण नियत्रण मंडळ व कामाच्या संयुक्त विद्यमाने एकल प्लॅस्टिकविरोधी मोहिमेबाबत जनजागृतीसाठी पर्यावरणदिनानिमित्त कल्याणच्या दुर्गामाता चौकातून अत्रे रंगमंदिरापर्यंत पर्यावरण रॅली काढण्यात आली. यात प्रदूषण नियत्रण मंडळाचे अधिकारी- कर्मचारी, कामा संघटना, उद्योजक, सीइटीपी संघटना तसेच कल्याण-डोंबिवली महापालिका प्रशासन सहभागी झाले होते.

हातात फलक घेत पर्यावरण संरक्षणाबाबत जनजागृती केली. यानिमित्ताने शहरातील अनेक भागांत संस्था, नागरिकांना कापडी पिशव्यांचे प्रदूषण नियंत्रण मंडळाकडून वाटप केले. प्लॅस्टिक वापराचे दुष्परिणाम आणि प्रशासनाकडून केली जाणारी कारवाई, नागरिकाच्या पर्यावरण समतोल राखण्यासाठी असलेल्या जबाबदाऱ्या याबाबत घोषणा आणि फलकांच्या माध्यमातून माहिती देण्यात आली. पर्यावरण रॅली अत्रे रंगमंदिरात पोहोचल्यानंतर या रॅलीचे रूपांतर चर्चासत्रात झाले. या वेळी प्लॅस्टिक मॅन अशी ओळख असलेल्या नंदकुमार गुरव यांनी प्लॅस्टिकबंदी का महत्त्वाची या विषयावर उपस्थितांशी संवाद साधला.

प्रोफेसर पुरुषोत्तम काळे यांनी प्लॅस्टिकचे दुष्परिणाम तसेच मानवी आरोग्यावर होणारे परिणाम याबाबत माहिती दिली. कल्याण-डोंबिवली महापालिकेच्या कार्यकारी अभियंता रोहिणी लोकरे यांनी पालिका प्रशासनाकडून केल्या जाणाऱ्या उपाययोजना आणि समस्यांची माहिती देत नागरिकांना प्लॅस्टिकचा वापर टाळण्याचे आवाहन केले. पालिका आयुक्त अभिनव गोयल यांनी म्हटले की, पर्यावरणाचा ऱ्हास दिवसागणिक होत आहे.

पर्यावरणहानीचे परिणाम
मागील २५ वर्षांपासून सुरू असलेल्या पर्यावरणहानीचे परिणाम आपण भोगत आहोत, पुढील पिढीला या दुष्परिणामापासून दूर ठेवण्यासाठी आपण पुढाकार घेणे गरजेचे आहे, असे म्हटले. प्रदूषण नियंत्रण मंडळाचे अधीक्षक अभियंता हजारे यांनी प्रास्ताविक केले, तर सूत्रसंचालन कार्यकारी अभियंता उपेंद्र कुलकर्णी यांनी केले. या वेळी प्रदूषण नियंत्रण मंडळाचे तांत्रिक सल्लागार नंदकुमार गुरव, अधीक्षक अभियंता जयवंत हजारे, उद्योजक देवेन सोनी, उदय वालावलकर, सेंच्युरी रेयॉनचे अधिकारी-कर्मचारी या पर्यावरण रॅलीत सहभागी झाले होते.