बोळिंज, ता. ५ (बातमीदार) : वीजचोरी प्रकरणात कंत्राटदारावर अचोळे पोलिस ठाण्यात गुन्हा दाखल करण्यात आला आहे. मेच्या पहिल्या आठवड्यात नालासोपारा पूर्वेतील संयुक्त नगर येथे जलवाहिनी टाकण्याचे काम सुरू असताना ईगल इन्फ्रा इंडिया या कंपनीने ३,५६० रुपयांची वीजचोरी केल्याने तक्रार दाखल करण्यात आली होती.

नालासोपारा पूर्वेतील संयुक्त नगर या ठिकाणी ईगल इन्फ्रा इंडिया या कंपनीतर्फे ४७० कोटींच्या कामातून जलवाहिनी टाकण्याचे काम सुरू होते. हे काम सुरू करण्याआधी तेथील सांडपाणी काढणे गरजेचे होते, मात्र या कामासाठी महावितरणची परवानगी न घेता वीजचोरी करून काम होत असल्याचे दिसून आले. याप्रकरणी आम आदमी पक्षाच्या कार्यकर्त्यांनी महावितरण अधिकाऱ्यांना माहिती दिली. त्यानंतर कारवाई करत महावितरणच्या अधिकाऱ्यांनी या कंपनीला नोटीस पाठवत ३५६० रुपयांचे देयक भरण्यास सांगितले. ईगल इन्फ्रा इंडिया या कंपनीने ८ मे रोजी हे पैसे भरले, परंतु विजेची चोरी झाल्याचे स्पष्ट झाल्याने अचोळे पोलिस ठाण्यात या कंपनीविरोधात गुन्हा दाखल करण्यात आला आहे.