समृद्धी प्रकल्पाची श्वेतपत्रिका काढा!

मुंबई, ता. ५ ः समृद्धी महामार्गाच्या अंतिम टप्प्याचे आज लोकार्पण होत असताना काँग्रेसने १५ कोटींनी या प्रकल्पाचा खर्च फुगवल्याचा आरोप केला आहे. ५५ हजार कोटी रुपयांचा समृद्धी महामार्ग शेवटी ७० हजार कोटी रुपयांवर गेला आहे. हा मार्ग भ्रष्टाचाराचे कुरण झाले आहे. त्यामुळे सरकारमध्ये हिम्मत असेल, तर समृद्धी महामार्ग प्रकल्पावर एक श्वेतपत्रिका काढावी, असे आव्हान काँग्रेसने सरकारला दिले.
समृद्धी महामार्गाच्या उद्‍घाटन सोहळ्यावर प्रतिक्रिया देताना काँग्रेस प्रदेशाध्यक्ष हर्षवर्धन सपकाळ म्हणाले, की घोडबंदर-भाईंदर बोगदा व उन्नत मार्ग प्रकल्पात तीन हजार कोटी रुपयांचा भ्रष्टाचार झाल्याचे उघड झाले आहे. सुप्रीम कोर्टाचा हातोडा पडल्याने नाईलाजाने या प्रकल्पाची निविदा रद्द करीत असल्याचे सरकारला जाहीर करावे लागले. समृद्धी महामार्ग प्रकल्पातही मोठ्या प्रमाणात भ्रष्टाचार झाला आहे. समृद्धी महामार्ग हा भ्रष्टाचाराचा महामार्ग आहे. या महामार्गासाठी किती पैसे लागले, शेतकऱ्यांना भूसंपादनाचे किती पैसे दिले, कंत्राटदारांना किती दिले, झाडे लावण्यास किती खर्च आला आणि टोलमधून किती वसुली सुरू आहे, याचा संपूर्ण लेखाजोखा श्वेतपत्रिकेतून मांडावा. ‘समृद्धी महामार्गाचे काम निकृष्ट दर्जाचे असल्याने अनेक भागांत तडे गेले आहेत. विविध अपघातांत अनेकांना जीव गमवावा लागला. शेकडो जण जखमी झाले आहेत. यात झालेल्या भ्रष्टाचाराची पोलखोल झाली पाहिजे,’ असेही काँग्रेस प्रदेशाध्यक्ष म्हणाले.