मतदानाची टक्केवारी आता जलद मिळणार

सकाळ वृत्तसेवा
मुंबई, ता. ५ ः लोकसभा आणि विधानसभा निवडणुकांदरम्यान मतदानाच्या टक्केवारीवरून विरोधी पक्षांनी निवडणूक आयोगावर जोरदार टीका केली होती. त्यामुळे भारत निवडणूक आयोगाने मतदार टक्केवारी अद्ययावत करण्यासाठी अधिक कार्यक्षम आणि तांत्रिकदृष्ट्या सुसज्ज प्रणाली सादर केली आहे. या नव्या प्रक्रियेमुळे मतदानाची टक्केवारी जलदगतीने देता येणार असल्याचा दावा निवडणूक आयोगाने केला आहे.
मतदान केंद्रातील प्रिसाइडिंग अधिकाऱ्यांना मतदान संपल्यानंतर उमेदवारांचे प्रतिनिधी असलेल्या पोलिंग एजंट्सना फॉर्म १७ सी देणे बंधनकारक असल्याची अट कायम राहणार आहे; मात्र व्हीटीआर ॲपच्या माध्यमातून जनतेला अंदाजे मतदान टक्केवारीची माहिती देण्याची जी पूरक, ऐच्छिक प्रक्रिया सुरू होती ती आता अधिक जलद आणि कार्यक्षम करण्यात येत आहे. नवीन प्रणालीअंतर्गत मतदानाच्या दिवशी प्रत्येक दोन तासाने प्रिसाइडिंग ऑफिसर मतदानाची टक्केवारी थेट ॲपवर नोंदवणार आहेत. पूर्वीप्रमाणेच अंदाजे मतदान टक्केवारी दर दोन तासांनी प्रसिद्ध केली जाईल. मतदान संपल्यानंतर मतदान केंद्र सोडण्यापूर्वी प्रिसाइडिंग अधिकारी ॲपवर (ECINET) अंतिम मतदानाची माहिती भरतील. यामुळे माहिती अपलोड होण्यात लागणारा वेळ कमी होईल व निवडणूक आयोगाच्या व्हीटीआरवर वेळेत आणि अचूक माहिती उपलब्ध होईल. जिथे मोबाईल नेटवर्क उपलब्ध नाही तिथे ही माहिती ऑफलाइन स्वरूपात साठवून नेटवर्क पुन्हा उपलब्ध झाल्यावर ती अपलोड करता येईल. यापूर्वी मतदानाची आकडेवारी सेक्टर ऑफिसर्सद्वारे हाताने गोळा केली जायची. फोन, एसएमएस किंवा मेसेजिंग अ‍ॅप्सद्वारे परत पाठवली जात होती. परिणामी मतदान टक्केवारीच्या अद्ययावत माहिती मिळण्यासाठी चार-पाच तासांपर्यंत विलंब होत असे आणि त्यामुळे अनेकदा गोंधळ निर्माण होत असे.