पाणबुड्यांबाबत खुलासा करा!

मुंबई, ता. ६ ः मोदी सरकारने सत्तेवर आल्यापासून एकही पाणबुडी निर्मिती वा खरेदीचा निर्णय घेतलेला नाही, हे खरे आहे का याचा खुलासा करावा, अशी मागणी काँग्रेस प्रवक्ते अनंत गाडगीळ यांनी केली आहे.
सीमेचे रक्षण करणाऱ्या सैन्याच्या युद्धसामग्रीसाठी वर्षानुवर्षे मोदी सरकारमध्ये मंजुरी मिळत नसल्याची टीका अनंत गाडगीळ यांनी केली आहे. भारतीय नौदलाकडे असलेल्या एकूण पाणबुड्यांपैकी जवळपास १५  पाणबुड्यांचे आयुष्य हे आता केवळ सात ते आठ वर्षांपर्यंतच मर्यादित आहे. याशिवाय तीन ते चार पाणबुड्या पुढील पाच वर्षांत निवृत्त कराव्या लागतील, या अवस्थेपर्यंत पोहोचल्या आहेत, असेही गाडगीळ यांनी सांगितले. २०२३च्या जुलैमध्ये पंतप्रधान मोदींच्या फ्रान्स भेटीनंतर तीन स्कॉर्पिन प्रकारच्या पाणबुड्यांचा करार झाल्याचे मोदी सरकारतर्फे घोषित करण्यात आले होते; मात्र ३० हजार कोटींच्या माझगाव डॉकसोबत झालेल्या करारास वर्ष उलटूनही केंद्रीय अर्थ खात्याने अजूनही मंजुरी दिलेली नाही, हेही खरे की खोटे याचा खुलासा करण्याची मागणीही गाडगीळ यांनी केली आहे. दिवंगत इंदिराजी गांधी यांच्या सरकारच्या काळात बॅ. विठ्ठलराव गाडगीळ संरक्षण उत्पादन मंत्री असताना अवघ्या दोन वर्षांत माझगाव डॉकने तीन फ्रिगेट्स व एका पाणबुडीचे जलावतरण केले होते, याची आठवणही अनंत गाडगीळ यांनी या वेळी करून दिली.