बेघर महिलांसाठी मुंबईत पहिला ‘अपना घर आश्रम’
आयुक्त सत्यनारायण चौधरी यांच्या हस्ते उद्घाटन
मालाड, ता. ७ (बातमीदार)ः बेघर, असहाय्य आणि आजारी लोकांच्या सेवेसाठी शिशु वेल्फेअर ट्रस्ट ऑफ इंडियाद्वारे मालाड पूर्व येथे अपना घर आश्रमाचे उद्घाटन प्रमुख पाहुणे कायदा आणि सुव्यवस्था संयुक्त आयुक्त सत्यनारायण चौधरी यांच्या हस्ते झाले.
देशाच्या इतर भागात सुमारे ६५ अपना घर आश्रम आहेत आणि आता मालाड पूर्व जनरल ए. के. वैद्य मार्ग व्हॅलेंटाइन कॉम्प्लेक्समध्ये असहाय्य, निराधार आणि गरजू महिलांसाठी आणखी एक आश्रम सुरू करण्यात आला आहे. हा आश्रम मुंबईत महिलांसाठी आणि वसईमध्ये पुरुषांसाठी चालवला जात आहे.
या वेळी सनदी अधिकारी निधी चौधरी म्हणाल्या, ‘आजारी लोकांना पाहताच त्यांना मदत करा आणि त्यांना प्रेम द्या. डोळे बंद करण्याऐवजी मनापासून सेवा करा.’ अपना घर आश्रमाचे संस्थापक डॉ. बी. एम. भारद्वाज म्हणाले, ‘गरजू लोकांची सेवा करण्यासाठी देव आपले दोन्ही हात उघडे ठेवून आपल्या सर्वांना आधार देत आहे.’ रामस्वरूप अग्रवाल म्हणाले, ‘हा आश्रम केवळ राहण्याचे ठिकाण नाही तर जीवनात आधाराची गरज असलेल्या सर्वांसाठी आशेचा किरण आहे. गरजूंनी ८६५५३४९९४० या क्रमांकावर संपर्क करण्याचे आवाहन संस्थेकडून केले आहे.
या कार्यक्रमाला सनदी अधिकारी निधी चौधरी, वीरपाल सिंग, डॉ. माधुरी भारद्वाज, डॉ. बी. एम. भारद्वाज, राष्ट्रीय अध्यक्ष रामस्वरूप अग्रवाल, अध्यक्ष सुभाष गुप्ता, अध्यक्षा अंबिका अग्रवाल, सचिव सीमा मुकीम, सहसचिव शिवानी पटोदिया, कोषाध्यक्ष मंजू मुरारका, सहकोषाध्यक्ष रश्मी हरलालका आणि अशोक गोयल यांच्यासह असंख्य लोक उपस्थित होते.

आपण सर्वांनी मिळून काहीतरी केले पाहिजे आणि लोकांमध्ये मूल्ये रुजवली पाहिजेत; जेणेकरून देशात अशा आश्रमांची गरज भासू नये.
- सत्यनारायण चौधरी, सहपोलिस आयुक्त, कायदा आणि सुव्यवस्था