नवी मुंबईत प्रथमच शिवराज्याभिषेक सोहळा
विद्यार्थ्यांचा सत्कार आणि मान्यवरांचा गौरव
तुर्भे, ता. ७ (बातमीदार) : शिवतुतारी प्रतिष्ठानच्या वतीने प्रथमच नवी मुंबईतील विष्णुदास भावे नाट्यगृहात शिवराज्याभिषेक सोहळ्याचे आयोजन करण्यात आले. या भव्य कार्यक्रमास नवी मुंबईतील विविध सामाजिक व सांस्कृतिक मंडळांनी मोठ्या संख्येने उपस्थिती दर्शवली. या सोहळ्यात दहावी व बारावी परीक्षेत प्रथम व द्वितीय क्रमांक मिळवलेल्या विद्यार्थ्यांचा गौरव मान्यवरांच्या हस्ते करण्यात आला. कार्यक्रम सुरू होण्यापूर्वी वाशी येथील मुख्य चौकात छत्रपती शिवाजी महाराज यांच्या अश्वारूढ पुतळ्यास नवी मुंबई महापालिकेचे उपायुक्त अभिलाषा म्हात्रे, उद्योजक प्रकाश बाविस्कर आणि प्रा. रवींद्र पाटील यांच्या हस्ते ढोल-ताशांचा गजर आणि फटाक्यांच्या आतषबाजीत पुष्पहार अर्पण करण्यात आला.
या कार्यक्रमाचे प्रमुख पाहुणे पानिपतकार व इतिहास संशोधक विश्वास पाटील होते. त्यांच्यासोबत पद्मश्री अच्युत पालव, उद्योजक प्रकाश बाविस्कर, कला क्षेत्रातील अशोक हांडे आणि क्रीडा क्षेत्रात अर्जुन पुरस्कारप्राप्त नवी मुंबईच्या उपायुक्त अभिलाषा म्हात्रे यांचा सन्मानही करण्यात आला. या वेळी अभिलाषा म्हात्रे म्हणाल्या, माझा प्रवासच माझा खरा पुरस्कार आहे. एशियन गेम्समधील अंतिम सामन्याचा तो क्षण, जेव्हा संपूर्ण स्टेडियम माझे नाव घेत होते, तोच माझ्या आयुष्यातील सर्वोच्च गौरव आहे. मेहनतीवर विश्वास ठेवल्यास यश अटळ आहे. तर प्रकाश बाविस्कर यांनी सांगितले, १९९१ मध्ये महापालिकेच्या स्थापनेपासून मी सहभागी आहे. पहिल्या टेबलपासून सुरुवात करून हजारो कुटुंबांना घरे देण्यापर्यंतचा प्रवास अनुभवला. पद्मश्री अच्युत पालव म्हणाले, मराठी भाषा लिहायला जितकी सोपी वाटते, तितकीच ती खोल आहे. त्याच भाषेच्या साधनेतून मिळालेला हा पुरस्कार म्हणजे जीवनभराच्या संघर्षाचे चीज आहे. या वेळी विश्वास पाटील यांनी, महाराजांच्या जीवनातील थरारक प्रसंग, फितुरांवर त्यांनी केलेला खर्च आणि शिवराज्याभिषेकाचे ऐतिहासिक महत्त्व याविषयी थेट इतिहासाच्या दाखल्यांसह प्रभावी शैलीत मांडणी केली. शिवाजी महाराज हे केवळ योद्धे नव्हते तर दूरदृष्टी असलेले राजकारणी होते, ज्यांनी आपला प्रत्येक निर्णय विचारपूर्वक घेतला, असे त्यांनी ठामपणे सांगितले.