उल्हासनगर, ता. ७ (बातमीदार) : काही दिवसांपासून समाज माध्यमांवर ख्रिस्ती लोक त्यांची अंतिम विधी हिंदू स्मशानभूमीत येऊन करत आहे. या विषयाला गांभीर्याने घेणारे ख्रिश्चन समाजाचे नेते व शिवसेना अल्पसंख्याक राज्य समन्वयक जितू राठोड यांनी उल्हासनगर महापालिका आयुक्त मनीषा आव्हाळे आणि पोलिस उपायुक्त सचिन गोरे यांना दिलेल्या निवेदनात मृत्यूच्या दाखल्यावर हिंदू किंवा ख्रिस्ती असा उल्लेख बंधनकारक करण्यात यावा, अशी मागणी केली आहे.
हिंदू लिहिलेल्या व्यक्तीला कोणत्याही ख्रिस्ती कब्रस्तानात दफन करण्यात येत असेल किंवा ख्रिस्ती लिहिलेल्या व्यक्तीचा हिंदू स्मशानभूमीमध्ये अंतिम संस्कार केला जात असेल, तर त्यांच्यावर कायदेशीर कारवाई करण्यात यावी, असे जितू राठोड यांनी निवेदनात म्हटले आहे. ख्रिस्ती दफनभूमीमध्ये दफन होणाऱ्या व्यक्तीच्या मृत्यू दाखल्यावर ख्रिस्ती असे स्पष्ट लिहिलेले असावे. ज्या चर्च व प्रार्थना घराचा तो सदस्य आहे, त्यांच्या लेटर पॅडवर स्पष्ट रीतीने त्यांनी लिहून द्यावे की हा व्यक्ती किती वर्षापासून त्यांच्या चर्च, प्रार्थना घराच्या सदस्य आहे, असे पत्र घेणे बंधनकारक ठेवण्यात यावे, अशी मागणीही राठोड यांनी केली आहे.