‘जंगल जंगल बात चली’ नाटकाला प्रतिसाद
घाटकोपर, ता. ९ (बातमीदार) ः जागतिक पर्यावरणदिनानिमित्त एन वॉर्ड महापालिकेच्या वतीने घाटकोपर पूर्व झवेरीबेन नाट्यगृह येथे सोमवारी (ता. ९) ‘जंगल जंगल बात चली’ हे या पर्यावरणावर आधारित नाटकाचे आयोजन करण्यात आले होते. यंग क्रिएटिव्ह प्रोडक्शन तसेच उपयुक्त संतोष कुमार धोंडे, सहाय्यक आयुक्त गजानन बेल्लाळे यांच्या वतीने या कार्यक्रमाचे आयोजन केले होते.
या नाटकातून पर्यावरणाबाबत जागरूकता करण्यात आली. गेल्या शंभर वर्षांत पृथ्वीवरून अनेक प्राणी नामशेष झाले आहेत. मानव, प्राणी, पक्षी आणि पर्यावरण हे एकमेकावर अवलंबून आहेत. यासाठी पर्यावरणाची जबाबदारी ही माणसाची आहे, असा संदेश या नाटकातून कलाकारांनी दिला.
निजामुद्दीन शाह यांनी या नाटकाचे लेखन व दिग्दर्शन केले आहे. या कार्यक्रमाला प्रमुख पाहुण्या म्‍हणून अभिनेत्री शिल्पा मेहता, विशाल म्हैसकर, उद्यान विभागाचे सुनील राठोड, पवार आदी उपस्थित होते. कार्यक्रमाचे सूत्रसंचालन वैशाली निकुंभ यांनी केले. या वेळी पर्यावरण सुरक्षेसाठी काम करणाऱ्या विविध संस्था आणि पालिकेतील कर्मचारी यांचा सहाय्यक आयुक्त गजानन बेल्लाळे यांच्या हस्ते सन्मान करण्यात आला.