रक्तदान शिबिराला उत्‍स्‍फूर्त प्रतिसाद
शिवडी, ता. १२ (बातमीदार) ः नॅशनल रेल्वे मजदूर युनियनच्या वाडीबंदर शाखेतर्फे वाडीबंदर रेल्वे डेपो येथे मंगळवारी (ता. १०) रक्तदान शिबिराचे आयोजन करण्यात आले असून कॉ. जॉन ओमेन यांच्या हस्ते उद्‌घाटन करण्यात आले. या शिबिराला कर्मचाऱ्यांचा चांगला प्रतिसाद लाभल्याने तब्बल ११८ बाटल्या रक्त संकलित करण्यात आले.
दिवसेंदिवस रक्तपेढ्यांमध्ये रक्ताचा तुटवडा ही गंभीर समस्या लक्षात घेऊन नॅशनल रेल्वे मजदूर युनियनचे महामंत्री कॉ. वेणू पी. नायर यांनी रक्तदान शिबिर राबविण्याचा निर्णय घेतला. त्यानुसार मुंबई विभागातील युनियनच्या ३० शाखांमध्ये रक्तदान शिबिराचे आयोजन करण्यास सांगितलेले आहे. युनियनतर्फे दरवर्षी रक्तदान शिबिराचे आयोजन करून अंदाजे दोन ते अडीच हजार बाटल्या जे. जे. महानगरपालिका रक्तपेढीस उपलब्ध करून दिल्या जातात. यंदाही जे. जे. महानगरपालिका रक्तपेढीचे जनसंपर्क अधिकारी अजय भिसे यांना संपर्क करून रक्त संकलित करून देण्यात येईल, असे आश्वासन कॉ. वेणू नायर यांनी दिले होते. त्यानुसार शिबिराअंतर्गत तब्बल ११८ बाटल्या रक्त संकलित करण्यात आले असून जे. जे. महानगर रक्तपेढीला सुपूर्द करण्यात आले. हे शिबिर यशस्वी करण्यासाठी गोवर्धन राठोड, विलास नारकर, नितीन केदारे, सुहास जगताप, विनायक शेवाळे, प्रिती शिरसाठ, रूशाल कराळे, रामबाबू भोसले यांनी मेहनत घेतली. दरम्यान, सहभागी रक्तदात्यांना भेटवस्तू देण्यात आल्या.