मद्यपी चालकाला दहा हजारांचा दंड
कल्याण कोळशेवाडी वाहतूक पोलिसांची कारवाई
कल्याण, ता. १२ : मद्यधुंद अवस्थेत एसटी बस चालवणाऱ्या बेशिस्त चालकावर वाहतूक पोलिसांनी थेट कारवाई केली आहे. तसेच त्याला दहा हजार रुपयांचा दंड ठोठावला आहे. कल्याण पूर्वेतील नेतिवली परिसरात बुधवारी (ता. ११) रात्री ही घटना घडली.

हेमंत मेश्राम नावाचा एसटीचालक रिकामी बस घेऊन विठ्ठलवाडी डेपोकडे निघाला होता. नेतिवली परिसरात त्याने एका रिक्षाला धडक दिली. या अपघातानंतर रिक्षाचालक व मेश्राम यांच्यात वाद सुरू झाला. वादाच्या दरम्यान कोळशेवाडी वाहतूक शाखेचे पोलिस घटनास्थळी दाखल झाले. पोलिसांना एसटीचालकाने मद्यप्राशन केल्याचा संशय आल्याने त्यांची अल्कोहोल तपासणी केली. तपासणीत मेश्राम दारूच्या नशेत असल्याचे स्पष्ट झाले. वाहतूक पोलिसांनी तत्काळ ‘ड्रिंक अँड ड्राइव्ह’अंतर्गत कठोर कारवाई करीत एसटी जप्त केली व चालकावर दहा हजार रुपयांचा दंड ठोठावला. या प्रकारामुळे एसटीसारखी महत्त्वाची सेवा धोक्यात घालणाऱ्या मद्यपी चालकांविरोधात कठोर कारवाई करावी, अशी मागणी केली जात आहे.