‘ट्रॅफिक नियमनसाठी उपाययोजना राबवा’
वाहतूक कोंडीबाबत बचाव समितीचे पोलिसांना निवेदन
कैलास म्हामले
कर्जत, ता. १२ ः वाढत्या वाहतूक कोंडीच्या पार्श्वभूमीवर कर्जत शहर बचाव समितीने कर्जत पोलिस ठाण्यात बुधवारी (ता. ११) निवेदन दिले. या निवेदनाद्वारे वाहतूक समस्या सोडविण्यासाठी ठोस उपाययोजना करण्याची मागणी केली आहे.
शहरातील बाजारपेठ, श्रीराम पूल आणि चारफाटा परिसरातील नियमांचे उल्लंघन आणि पर्यटकांच्या गर्दीमुळे नागरिक त्रस्त झाले आहेत. यासाठी बचाव समितीने विविध उपाययोजना प्रस्तावित केल्या आहेत. या निवेदनप्रसंगी समितीचे सदस्य तसेच स्थानिक नागरिक उपस्थित होते.
यामध्ये बाजारपेठ आणि अन्य महत्त्वाच्या ठिकाणी सीसीटीव्ही कॅमेरे बसवून ट्रॅफिक फाइन प्रणाली सक्षम करणे, नो-एन्ट्री झोनमध्ये टायर किलर बसवणे जेणेकरून अप्रामाणिक प्रवेश थांबवता येईल, श्रीराम पूल व चारफाटा येथे सिग्नल यंत्रणा तातडीने सुरू करणे जेणेकरून ट्रॅफिक पोलिसांवरचा भार कमी होईल, शहरासाठी कायमस्वरूपी ट्रॅफिक पोलिसांची नियुक्ती करणे ही गरज वेळोवेळी अधोरेखित केली जात आहे, बचाव समितीने कर्जत नगर परिषद व पोलिस प्रशासन यांच्यामध्ये योग्य समन्वय साधून ही समस्या तातडीने सोडवावी, अशी मागणी केली.
यावेळी कर्जत शहर बचाव समितीचे ॲड. कैलास मोरे, राजेश लाड, रंजन दातार, मिलिंद भागवत, विजय बेडेकर, दीपक बेहरे, सुधांशू वानगे, कर्णिक, प्रशांत उगले, अनिल भोसले, खानविलकर, लोकेश यादव, स्विटी बार्शी, सतीश मुसळे आदी समन्वयक उपस्थित होते.
शहरातील वाहतूक कोंडीबाबत गेल्या काही महिन्यांपासून आम्ही पाठपुरावा करीत आहोत. नगर परिषद आणि पोलिस प्रशासनाने सहकारातून समस्या सोडवाव्यात. नागरी प्रश्न सुटले नाहीत, तर तीव्र आंदोलन छेडण्यात येईल.
- ॲड. कैलास मोरे, कर्जत शहर बचाव समिती