भिवंडी, ता.१४ (बातमीदार): शहरातील नूरी नगर परिसरात बेकायदा झोपड्यांवर शनिवारी महापालिकेच्या पथकाने कारवाई केली. या कारवाईमुळे स्थानिकांमध्ये नाराजी असून प्रशासनाकडून पारदर्शक कारभारावरही प्रश्न उपस्थित केले आहेत.
भिवंडी महापालिकेचे आयुक्त अनमोल सागर शहरातील बेकायदेशीर बांधकामांना आळा बसवण्यासाठी कारवाईचा धडाका लावला आहे. असे असताना पाच प्रभागात बेकायदेशीर इमारती आणि झोपड्यांचे बांधकाम पूर्वीपेक्षा वेगाने होत आहे. बिट निरीक्षक, क्षेत्रीय अधिकारी, संबंधित अभियंता आणि प्रभाग अधिकाऱ्यांच्या दुर्लक्षामुळे हे प्रकार होत आहेत. नूरी नगरमधील बेकायदेशीर झोपड्यांचे बांधकाम जोरात सुरू होते. याबाबत अनेक तक्रारी विभाग समिती क्रमांक एकच्या सहाय्यक आयुक्तांकडे आल्या होत्या. यावेळी काही भूमाफिया गरिबांची दिशाभूल करून बेकायदेशीर झोपड्यांची विक्री करत असल्याचे सहाय्यक आयुक्त मकसूम शेख यांनी सांगितले. त्यामुळे या फसवणुकीला कोणी बळी पडू नये, यासाठी कारवाई करण्यात आली.
---------------------------------
कारवाईत दुजाभावचा आरोप
पावसाळ्यात झोपड्या तसेच कोणत्याही प्रकारच्या पाडकामावर बंदी घालण्याचे शासनाने आदेश दिले आहेत. अशा परिस्थितीत, नूरी नगरमध्ये केलेली ही कारवाई अन्यायकारक असल्याचा आरोप नागरिकांनी केला आहे. तसेच बेकायदेशीर बांधकाम असली तरी पावसाळ्यापूर्वी कारवाई करायला हवी होती, असे नागरिकांचे म्हणणे आहे. तसेच पालिकेकडून काही निवडक ठिकाणांपुरती कारवाई केली जात असल्याने उर्वरित क्षेत्रांकडे डोळेझाक सुरू असल्याचा आरोप होत आहे.