जिल्हा रुग्णालयात एकाच दिवशी ५० बालकांवर शस्त्रक्रिया
ठाणे शहर, ता. १५ (बातमीदार) : खासगी रुग्णालयात होणाऱ्या खर्चिक आणि अवघड शस्त्रक्रिया ठाणे जिल्हा सामान्य रुग्णालयात पार पडत आहेत. रुग्णालयाने रविवारी (ता. १५) एकाच दिवशी ५० लहान मुलांच्या सोप्या आणि जोखमीच्या शस्त्रक्रिया केल्या आहेत. राष्ट्रीय बालस्वास्थ्य कार्यक्रमाअंतर्गत शस्त्रक्रिया सप्ताहानिमित्त ० ते १८ वयोगटातील मुला-मुलींच्या केलेल्या शस्त्रक्रियेत हर्निया, रक्ताची गाठ, चिकटलेली बोटे, फायमोसिस, मान, पोटाची गाठ आदींचा समावेश आहे.

जिल्हा रुग्णालयात दरदिवशी सुमारे ६०० ते ७०० रुग्ण उपचार घेण्यासाठी येतात. काहीवेळा या रुग्णांवर लहान-मोठ्या शस्त्रक्रिया पार पाडल्या जातात; मात्र रविवारी लहान मुलांवर विविध शस्त्रक्रिया करण्यात आल्या. ही मुले ठाणे, पालघर जिल्ह्यातून येथे दाखल झाली होती, अशी माहिती जिल्हा शल्यचिकित्सक डॉ. कैलास पवार यांनी दिली. तर ठाणे जिल्हा रुग्णालयात चांगल्या शस्त्रक्रिया होतात हे केवळ ऐकून होते; मात्र आज प्रत्यक्ष अनुभवले आहे. एकाच दिवशी एवढ्या मुलांवर शस्त्रक्रिया बघण्याची पहिलीच वेळ आहे. सरकारी रुग्णालयात अशा शस्त्रक्रिया पार पडत असतील तर सर्वांनी अशा रुग्णालयात येऊन उपचार घ्यावेत, असे आवाहन कल्याण येथून आलेल्या रुग्णाच्या नातेवाईक विजया सोनावणे यांनी केले आहे.

दोन दिवस आधीच रुग्णालयात दाखल
शस्त्रक्रिया करायची असल्यामुळे एक दोन दिवस आधीच मुलांना घेऊन त्यांचे पालक जिल्हा रुग्णालयात दाखल झाले होते. त्यामुळे त्यांच्या खाण्या-पिण्याची संपूर्ण सोय रुग्णालयाने केली होती. केईएम हॉस्पिटलचे माजी अधिष्ठाता डॉ. संजय ओक यांच्या मार्गदर्शनाखाली हर्निया, हायड्रोसिल, चरबीची गाठ, फायमोसिस, चिकटलेली बोटे, चिकटलेली जीभ, रक्ताची गाठ, मूळव्याध अशा शस्त्रक्रिया पार पडल्या आहेत.

रविवारी राष्ट्रीय बालस्वास्थ्य कार्यक्रमाअंतर्गत शस्त्रक्रिया सप्ताहानिमित्त केईएम हॉस्पिटलचे माजी अधिष्ठाता डॉ. संजय ओक आणि त्यांच्या सहकारी डॉक्टरांनी रुग्णालयात लहान मुला-मुलींच्या शस्त्रक्रिया केल्या. या वेळी काही जोखमीच्या शस्त्रक्रियादेखील यशस्वी पार पडल्या आहेत. जिल्हा रुग्णालयातील शस्त्रक्रिया कक्षात आधुनिक उपकरणे असून, मोठ्या कुशलतेने वैद्यकीय तज्ज्ञ रुग्णांच्या शस्त्रक्रिया करतात.
- डॉ. कैलास पवार, जिल्हा शल्यचिकित्सक, ठाणे