वसई, ता. २१ (बातमीदार) : मुलांना खेळांचा सराव करता यावा, याकरिता मैदाने आरक्षित ठेवण्यात आली आहेत. त्यामुळे अन्य कार्यक्रमाला उपलब्ध केली जाणार नाहीत, असा निर्णय प्रशासनाने घेतला आहे. ग्रामीण भागातील मुलांना सोईचे असणारे वसई पूर्वेकडील धुमाळनगर परिसरातील आप्पा मैदानाचे आरोग्य बिघडले आहे. येथे अस्वच्छता आणि अन्य समस्यांनी ग्रासले असून, याबाबत वसई विरार महापालिकेने लक्ष द्यावे, अशी मागणी खेळाडू आणि नागरिकांतून जोर धरू लागली आहे.

मैदानात क्रिकेट सामने आणि अन्य खेळ खेळण्यासाठी खेळाडू येतात. मोठ्या स्पर्धादेखील भरवल्या जातात, मात्र हे मैदान दुर्लक्षित आहे. कचऱ्याचे ढीग, बेकायदा वाहने उभी करणे, आजूबाजूच्या परिसरातील घाणीचे पाणी अशा समस्या निर्माण होत आहेत. मैदानासाठी सुरक्षारक्षक नाही तसेच प्रवेशद्वार, स्वच्छतागृह व अन्य सुविधा नाहीत. त्यामुळे गैरसोय होत आहे.

आप्पा मैदान हे धुमाळनगर परिसरातील मुलांपासून तरुणांपर्यंत सर्वांसाठी एकमेव खेळाचे व विरंगुळ्याचे ठिकाण आहे. खेळाडूंना प्रोत्साहन देण्यासाठी महापालिका विविध उपक्रम, शालेय स्पर्धा घेते. मैदानासाठी प्रशासनाकडून कोणतीच दखल घेतली गेली नाही. त्यामुळे नागरिकांकडून नाराजी व्यक्त केली जात आहे.

वालीव येथील मैदानात येणाऱ्या मुलांच्या सुरक्षेसाठी प्रवेशद्वार, सुरक्षा भिंत व सुरक्षारक्षक असावेत. विजेची व्यवस्था करून दिवे लावण्यात यावे. शौचालयासह अन्य उपाययोजना महापालिकेने करून मैदान व खेळाडूंना उभारी देण्यासाठी प्रयत्न करावेत, यासाठी पाठपुरावा करणार आहे.
- जगदीश भोईर, सामाजिक कार्यकर्ते

वसई पूर्वेला आप्पा मैदानात खेळाडूंसाठी सुविधा नाहीत. मैदानाची दुरवस्था झाली आहे. त्यामुळे महापालिकेने याकडे तत्काळ लक्ष देऊन खेळाडूंसाठी आधुनिक सुविधा पुरवाव्यात.
- महेश धनगर, नागरिक

वसई-विरार महापालिकेच्या वालीव प्रभागात असलेल्या आप्पा मैदानात अस्वच्छता किंवा अडचणी असतील, तर त्याची पाहणी करून तत्काळ उपायोजना करण्यात येईल.
- नीलेश म्हात्रे, सहाय्यक आयुक्त, वसई-विरार महापालिका