पोलादपूर, ता. २१ (बातमीदार)ः संततधार पावसामुळे घाट मार्गावर दरड कोसळण्याचे सावट कायम आहे. गुरुवारी (ता. १९) सायंकाळी पोलादपूर-महाबळेश्वर मार्गावर कापडे खुर्दच्या पुढे व इतर दोन ठिकाणी मातीचा ओसरा झाडाच्या फांद्यांसह आल्याने काही काळ वाहतूक बंद ठेवण्यात आली होती. तर याच मार्गावर सातारा जिल्हा हद्दीत दरड आल्याने वाहतूक काही काळ ठप्प झाली. पोलादपूर हद्दीत चिरेखिंडीजवळ तसेच कापडे खुर्द गावाजवळ तीन ठिकाणी मातीचा भराव आल्‍याने काही तासांकरिता वाहतूक बंद ठेवण्यात आली होती. प्रशासनाने तातडीने जेसीबीच्या साहाय्याने माती व झाडे बाजूला करण्यास सुरुवात केली.
पावसामुळे पोलादपूर ते आंबेनळी घाटरस्त्यासह कशेडी घाटमार्गावर वर्दळ कमी होती. बुधवार व गुरुवारी झालेल्या मुसळधार पावसात कशेडी घाट जुन्या मार्गवर तसेच आंबेनळी घाटात डोंगरावरून मातीचा भराव खाली आल्याने वाहतुकीस अडथळा निर्माण झाला. दरड रोखण्यासाठी दरवर्षी पावसाळी हंगामात कशेडीसह आंबेनळी घाटात लाखो रुपये खर्च करून उपाययोजना करण्यात येतात; मात्र तरीही वारंवार दगड घरंगळणे, मातीचा भराव रस्‍त्‍यावर येणे, असे प्रकार घडत असल्‍याने प्रवाशांसह वाहनचालकांमध्ये भीतीचे वातावरण आहे.

...........

विजेचा शॉक लागल्याने तीन जनावरे दगावली
म्हसळा (बातमीदार) ः तालुक्यातील कुडतुडी गौळवाडी येथील शेतकरी अश्विनी अशोक कासार यांच्या मालकीचा बैल व गाय आणि दुसरे शेतकरी शंकर लक्ष्मण मिरगल यांची गाय अशी तीन गुरे गावाशेजारील जंगलात चरायला गेली होती. वादळी वाऱ्यामुळे वीजवाहिनी तुटल्‍याने विजेचा धक्‍का लागून तीनही गुरांचा मृत्‍यू झाला. ऐन शेतीच्या कामाला सुरुवात झाली असताना, कुडतुडी येथील शेतकऱ्यांच्या गोधनाचे नुकसान झाले आहे.
गुरांचा विजेचा धक्‍का लागला त्‍याठिकाणी पाणवठ्याकडे जाण्याचा मार्ग आणि शेतात जाण्याची पायवाट आहे. घटनेची माहिती मिळताच तालुका कृषी अधिकारी, मंडळ अधिकरी, तलाठी, वीज वितरण कंपनीचे अभियंता, पोलिस अधिकारी यांनी घटनास्थळी पाहणी व पंचनामा केला. तर वीज वितरणमार्फत नुकसानग्रस्त शेतकऱ्यांना भरपाई देण्यात येणार असल्याचे सहाय्यक अभियंत्‍यांनी सांगितले.