खदाणीत पडलेल्या तरुणाचा मृतदेह सापडला
सकाळ वृत्तसेवा
डोंबिवली, ता. २६ : डोंबिवली पूर्वेतील दावडी येथील खदाणीजवळ मंगळवारी मध्यरात्री काही तरुण खेकडे पकडण्यासाठी गेले होते. या वेळी तोल जाऊन किरण शिंदे (वय २४) हा तरुण पाण्यात पडला होता. बुधवारी दिवसभर अग्निशमन दलाचे जवान त्याचा शोध घेत होते; मात्र किरण सापडला नव्हता. अखेर गुरुवारी (ता. २६) सकाळी किरणचा मृतदेह अग्निशमन दलाच्या जवानांच्या हाती लागला. मानपाडा पोलिसांच्या ताब्यात तो देण्यात आला असून या घटनेची नोंद केली आहे.
डोंबिवली पूर्वेतील दावडी येथील खदाण परिसरात मंगळवारी रात्री काही तरुण हे खेकडे पकडण्यासाठी गेले होते. या वेळी किरण हा खेकडे शोधत असताना तोल जाऊन पाण्यात पडला. किरणचा भाऊ व त्याच्या मित्रांनी त्याचा आजूबाजूच्या परिसरात शोध घेतला; मात्र तो सापडला नाही. अखेर त्याने ही माहिती घरच्यांना सांगितले. बुधवारी दुपारी अग्निशमन दलास याची माहिती देण्यात आली. अग्निशमन दलाच्या जवानांनी बुधवारी सायंकाळी सात वाजेपर्यंत त्याचा शोध घेतला; मात्र तो सापडला नाही. अखेर अंधार पडल्याने जवानांनी शोधकार्य थांबवले. गुरुवारी सकाळी आठच्या सुमारास किरणचा मृतदेह हा पाण्यात तरंगताना दिसून आला. ग्रामस्थांनी याची माहिती अग्निशमन दलास दिल्यावर त्यांनी मृतदेह पाण्यातून बाहेर काढत मानपाडा पोलिसांच्या ताब्यात दिला.