नागरिकांच्या सोयीसुविधांसाठी विविध विकासकामे सुरू : खासदार सुनील तटकरे
अलिबाग, ता. २६ (वार्ताहर) ः महायुती सरकारच्या माध्यमातून तसेच मुख्यमंत्री देवेंद्र फडणवीस व उपमुख्यमंत्री अजित पवार आणि उपमुख्यमंत्री एकनाथ शिंदे यांच्या मार्गदर्शनाखाली सर्वसामान्य नागरिकांना सर्व सोयीसुविधा उपलब्ध करून देण्यासाठी विविध विकासकामे सुरू करण्यात आली आहेत, अशी माहिती खासदार सुनील तटकरे यांनी पत्रकार परिषदेत दिली.
खासदार सुनील तटकरे यांनी गुरुवारी (ता. २६) अलिबाग शहरातील राष्ट्रवादी काॅंग्रेसच्या पक्ष कार्यालयात पत्रकार परिषद घेतली. त्या वेळी त्यांनी विविध विषयांवर चर्चा केली. रायगड जिल्ह्यात सुरू असलेल्या व होऊ घातलेल्या विविध विकासकामांबाबत त्यांनी या वेळी पत्रकारांना माहिती दिली. तसेच नागरिकांना भेडसावणाऱ्या समस्या सोडविण्याबाबत आश्वासन दिले. आगामी स्थानिक स्वराज्य संस्थांच्या होणाऱ्या निवडणुका युतीसोबतच समन्वयाने लढविण्याचा आमचा प्रयत्न असेल. याबाबत महायुतीतील सर्व पक्षश्रेष्ठी चर्चा करून निर्णय घेतील. गेल्या अनेक वर्षांपासून राष्ट्रवादी काॅंग्रेस शेकापसोबत निवडणुका लढत असले तरीदेखील आता अशी शक्यताही मला वाटत नाही, असे या वेळी त्यांनी स्पष्ट केले. अलिबागकरांची रेल्वे नसल्यामुळे होणारी गैरसोय टाळण्यासाठी माझ्याकडून मी पूर्ण प्रयत्न करीत आहे. या ठिकाणी रेल्वे सुरू करण्यासाठी नवीन रेल्वे मार्ग निर्माण करावा लागणार आहे. यासाठी येत्या अधिवेशनात पुन्हा एकदा मुद्दा उपस्थित करून नक्कीच तोडगा काढण्यात येईल, असेही त्यांनी स्पष्ट केले.
..............
आरसीएफ काॅलनीचे गेट खुले करण्याचे आदेश
गेल्या अनेक दिवसांपासून स्थानिक नागरिकांसाठी बंद करण्यात आलेले आरसीएफ कंपनीच्या वसाहतीचे मेन गेट पुढील चार दिवसांत खुले करण्याचे आदेश खासदार सुनील तटकरे यांनी दिले आहेत. याबाबत अनेक नागरिकांच्या तक्रारी प्राप्त झाल्या होत्या. त्याचप्रमाणे अलिबाग राष्ट्रवादी काॅंग्रेस युवक तालुकाध्यक्ष मनोज शिर्के यांनी याबाबत खासदार तटकरे यांनी निवेदन दिले होते. खासदार सुनील तटकरे यांनी हस्तक्षेप करून आरसीएफ कंपनी प्रशासनाशी चर्चा करण्यासाठी गुरुवारी ता. २६ बैठक बोलावली होती. जर कंपनी प्रशासनाने याबाबत कार्यवाही केली नाही तर अलिबाग तहसीलदार व प्रांताधिकारी आपले अधिकार वापरून गेट खुले करतील, असा इशारा खासदार सुनील तटकरे यांनी कंपनी प्रशासनाला दिला आहे.