मुरबाड ता. १ (बातमीदार)ः मुरबाड ते कल्याण, कल्याण ते मुरबाड असा दररोज प्रवास करणाऱ्या शेकडो प्रवाशांसाठी राज्य परिवहन महामंडळाची सुविधा अपुरी पडत असल्याने प्रवासी हैराण झाले आहेत. अशातच बस वेळेवर सोडल्या जात नसल्याने प्रवाशांची मागणी आहे.
मुरबाड व कल्याण या दोन्ही एसटी आगारात बांधकाम सुरू असल्याने या दोन्ही ठिकाणच्या बस आगाराच्या इमारती तोडण्यात आल्या आहेत. त्यामुळे प्रवाशांना बसण्यासाठी जागा उरलेली नाही. मुरबाड ते कल्याण, कल्याण ते मुरबाड या ठिकाणी शेकडो प्रवासी दररोज प्रवास करत असतात. महिला व वयोवृद्ध प्रवाशांना शासनाने बस प्रवासात सवलत जाहीर केल्याने प्रवाशांची संख्या वाढलेली आहे. त्यामुळे प्रवाशांना अधिकाधिक बस गाड्या उपलब्ध करून द्याव्यात, अशी प्रवाशांची मागणी आहे. याबाबत एसटीचे मुरबाड आगार व्यवस्थापक योगेश मुसळे यांना विचारले असता मुरबाड आगारातून मुरबाड-कल्याण व मुरबाड-बदलापूर मार्गावर एक बस गाडी वाढीव सोडणार असल्याचे सांगितले.