बस थांब्यावर निवारा शेडअभावी प्रवाशांची गैरसोय
खारघर हिरानंदानीमध्ये भरपावसात करावी लागतेय प्रतीक्षा
खारघर, ता. ५ (बातमीदार) : मुंबई-पुणे महामार्गावरील खारघर हिरानंदानी बस थांब्यावर प्रवाशांसाठी निवारा शेड नसल्याने प्रवाशांची गैरसोय होत आहे. प्रवाशांना पावसाळ्यात बसची वाट पाहत रस्त्यावर थांबण्याची वेळ आल्याने नाराजी व्‍यक्‍त केली जात आहे.
पुणे-मुंबई महामार्गावर खारघर हिरानंदानी उड्डाणपुलाच्या दोन्ही बाजूने बस थांबा आहे. या बस थांब्यावरून पनवेल, मुंबईकडून पुणे, कोल्हापूर, सोलापूर, सातारा, कोकण आदी ठिकाणी पाचशेहून अधिक एसटी बस ये-जा करीत असतात. या दोन्ही बस थांब्यावर प्रवाशांची नेहमी वर्दळ असते. पहाटे ५ ते रात्री १ वाजेपर्यंत प्रवासी बसने प्रवास करतात. खारघर हिरानंदानी बस थांब्यावरून दिवसभरात पाच हजारांहून अधिक प्रवासी पुणे-मुंबईकडून पुणे, कोल्हापूर, सोलापूर, सातारा, कोकण आदी भागात प्रवास करतात. पनवेलकडून मुंबईकडे जाताना खारघर येथे राज्य परिवहनकडून निवारा शेड उभारण्यात आले आहे, मात्र मुंबईकडून पुण्याच्या दिशेने जाणाऱ्या खारघर बस थांब्यावर निवारा शेड नसल्यामुळे प्रवाशांची गैरसोय होत आहे. दरम्यान, सात वर्षांपूर्वी खासदार श्रीरंग बारणे यांच्या खासदार निधीतून खारघरयेथील बस थांब्यावर निवारा शेड उभारण्यात आले होते, मात्र बस थांबा शेजारी पदपथ आणि जलवाहिनीचे काम सुरू असल्याने तसेच निवारा शेड जीर्ण झाल्यामुळे तो हटवण्यात आला आहे. सध्या निवारा शेड नसल्यामुळे बस थांब्यावर प्रवाशांना ऊन-वारा-पाऊस या सर्वांशी सामना करत बसची प्रतीक्षा करावी लागते. बस थांब्यावर प्रवाशांची होणारी गैरसोय पाहून रहिवासी आणि भाजपचे रायगड जिल्हा सचिव कीर्ती नवघरे यांनी पनवेल महापालिका प्रशासनाने महामार्गावरील दोन्ही बाजूला पालिकेने निवारा शेड उभारावे, अशी मागणी केली आहे
...................
कोट :
पालिकेकडून पहिल्या टप्प्यात वसाहतअंतर्गत असलेल्या बस थांब्यावर निवारा शेड उभारले जात आहे. दुसऱ्या टप्‍प्‍यात खारघर रेल्वेस्थानक आणि सायन-पनवेल महामार्गावरील खारघर हिरानंदानी येथे निवारा शेड उभारण्याचे नियोजन करण्यात आले आहे.
-डाॅ. वैभव विधाते, उपायुक्त, पनवेल महापालिका
.........................
कोट :
सायन-पनवेल महामार्गावरील खारघर हिरानंदानी दोन्ही बाजूने बस थांब्यावर निवारा शेड उभारणीची मागणी करण्यात आली आहे. पुढील महिनाभरात निवारा शेड उभारले जाईल, यासाठी आमदार प्रशांत ठाकूर यांच्या माध्यमातून प्रयत्न सुरू आहेत.
- कीर्ती नवघरे, जिल्हा सचिव, भाजप