शरीरसुखाची मागणी करत महिलेचा विनयभंग
रोहा पोलिस ठाण्यात आरोपीविरोधात गुन्हा दाखल
रोहा, ता. ८ (बातमीदार) ः रानात बकऱ्या चारण्यासाठी गेलेल्या महिलेकडे शरीरसुखाची मागणी केली. पीडित महिलेने विरोध केला असता तिला मारहाण करून आरोपीने घटनास्थळावरून पळ काढला. ही घटना काजूवाडी माळरान येथे घडली असून, यातील आरोपीविरोधात रोहा पोलिस ठाण्यात गुन्हा दाखल केला आहे. दरम्यान, आरोपी अद्याप फरार असल्याची माहिती पोलिसांनी दिली.
रोहे तालुक्यातील ताम्हणशेत आदिवासीवाडी येथील रवी असे आरोपी व्यक्तीचे नाव आहे. गुरुवारी (ता. ३) दुपारी अडीच वाजेच्या सुमारास तारेघर आदिवासीवाडी येथील एक महिला बकऱ्या चरण्यासाठी गेली असता आरोपीने तिच्याकडे शरीरसुखाची मागणी केली. याला विरोध केल्याने आरोपीने महिलेचे तोंड दाबून मारहाण केली. या वेळी पीडितेने आरडाओरड केल्याने आरोपी घटनास्थळावरून पसार झाला. या घटनेमुळे परिसरात एकच खळबळ उडाली असून, पोलिस निरीक्षक मारुती पाटील यांच्या मार्गदर्शनाखाली पोलिस नाईक अधिक तपास करत आहेत.