अंबरनाथ, ता. ९ (बातमीदार) : अंबरनाथमध्ये सिंगल युज प्लॅस्टिक विरोधातील कारवाईला नगरपालिकेच्या वतीने पुन्हा सुरुवात करण्यात आली आहे. शहराच्या पश्चिम भागातील छत्रपती शिवाजी महाराज भाजी मार्केटमध्ये प्लॅस्टिकचा वापर टाळावा, यासाठी जनजागृती करण्यात आली. तसेच प्लॅस्टिक जप्ती आणि दंडात्मक कारवाईही करण्यात आली.
प्लास्टिक विरोधातील या मोहिमेदरम्यान विनापरवाना आणि बंदी असलेल्या सिंगल युज प्लॅस्टिकचा वापर करणाऱ्या विक्रेत्यांकडून मोठ्या प्रमाणात साहित्य जप्त करण्यात आले. या कारवाईत नगर परिषदेच्या आरोग्य विभागप्रमुख राजेश शिंदे आणि अंबरनाथ पश्चिम येथील सर्व स्वच्छता निरीक्षकांनी सहभाग घेतला होता. प्लॅस्टिक वापराबाबत सरकारने नमूद केलेल्या नियमानुसार प्रथम पाच हजार रुपये, दुसऱ्यांदा १० हजार रुपये आणि तिसऱ्यांदा आढळल्यास २५ हजार रुपये व तीन महिने शिक्षा करण्यात येईल, असे नागरिक व दुकानदारांना सांगण्यात आले. विक्रेत्यांना प्लॅस्टिकबंदीविषयी माहिती देण्यात आली. पर्यायी पर्यावरणपूरक साहित्याचा वापर करण्याचे आवाहन करण्यात आले. तसेच काही विक्रेत्यांवर दंडात्मक कारवाई करण्यात आली.