सहावर्षीय मुलाचा विंचूदंशाने मृत्यू

आरोग्य असुविधांमुळे मृत्यू झाल्याचा कुटुंबीयांचा आरोप

बदलापूर, ता. ९ (बातमीदार) : कासगाव येथील आदिवासी वस्तीत राहणाऱ्या सहावर्षीय वीर शीद या बालकाचा विंचूदंशाने मृत्यू झाल्याची घटना सोमवारी (ता. ७) घडली. वीरला प्राथमिक आरोग्य केंद्रात दाखल केले असता, या ठिकाणी विषारी दंशासाठी कोणतीही उपाययोजना नसल्याने त्याला आधी बदलापुरातील खासगी रुग्णालय आणि त्यानंतर वीरची प्रकृती खालावल्याने पुढील उपचारासाठी कळवा रुग्णालयात नेत असताना त्याचा दुर्दैवी मृत्यू झाला. प्राथमिक आरोग्य केंद्रातील असुविधांमुळे वीरचा मृत्यू झाल्याचा आरोप शीद कुटुंबीयांनी केला आहे.

बदलापूर व वांगणीदरम्यान कासगाव येथील आदिवासी वस्तीत राहणाऱ्या, शेतात मोलमजुरी करून पोट भरणाऱ्या पिंटू शीद यांचा सहा वर्षांचा मुलगा वीर हा रविवारी (ता. ६) शाळेच्या आवारात खेळत असताना सायंकाळी सात वाजण्याच्या सुमारास त्याच्या पायाला काहीतरी चावल्यासारखे वाटले. थोडा वेळाने पाय चोळत असताना, तो चक्कर येऊन खाली कोसळला. या वेळी त्याच्या मित्रांनी त्याला त्या अवस्थेत घरी आणले, यादरम्यान थोडाफार शुद्धीवर असताना त्याने पायाला काहीतरी चावल्याचे सांगितले. या वेळी घाबरलेल्या आई-वडिलांनी गावकऱ्यांच्या मदतीने त्याला प्राथमिक उपचार केंद्रात नेले; मात्र याठिकाणी विषारी दंशासाठी इंजेक्शन उपलब्ध नसल्याचे सांगण्‍यात आले. त्यामुळे या कुटुंबाने वीरला बदलापूर पूर्व येथील एका खासगी रुग्णालयात दाखल केले; मात्र वीरला नेमका दंश कशाचा झाला, याचा अंदाज न आल्याने, उपचार करण्यात अडचणी येत होत्या. त्यातच त्याची प्रकृती खालावत गेली. त्याला अतिदक्षता विभागात उपचाराची गरज लागणार असल्याचे सांगण्यात आल्याने वीरला त्याच्या पालकांनी त्याला कळवा येथील शासकीय रुग्णालयात हलविण्याचा निर्णय घेतला; मात्र यादरम्यान त्याची प्रकृती जास्तच खालावल्याने रुग्णालयात उपचार सुरू होण्यापूर्वीच त्याचा मृत्यू झाला. पालकांच्या सांगण्यानुसार कळवा येथील रुग्णालयात डॉक्टरांनी वीरला वाचविण्यासाठी शर्थीचे प्रयत्न केले; मात्र त्यांना यात यश आले नाही.

..
आमच्या जीवाचे मोल नाही का?
प्राथमिक आरोग्य केंद्रात विषारी दंश होण्याच्या तक्रारीवर कोणतेच उपचार आणि इंजेक्शन वेळेवर उपलब्ध नसल्याने, अनेकांना जीव गमावण्याची वेळ आली आहे. त्यामुळे आम्ही आदिवासी आहोत म्हणून आमच्या जीवाचे मोल नाही का? आम्हाला चांगल्या आरोग्य सुविधा का मिळत नाहीत, असा प्रश्न वीरचे काका रघुनाथ शीद यांनी उपस्थित केला आहे.