शहापुरातील शाळेत किळसवाणा प्रकार

शहापूर, ता. ९ (वार्ताहर) : शाळेच्या प्रसाधनगृहात रक्ताचे डाग आढळून आल्याने ५ वी ते १० वीच्या सर्वच विद्यार्थिनींचा मासिकधर्म तपासण्यासाठी त्यांना विवस्त्र करण्यात आल्याची धक्कादायक घटना मंगळवारी (ता. ८) शहापूर तालुक्यातील आर. एस. दमानी या इंग्रजी माध्यमाच्या शाळेत घडली. विद्यार्थिनींनी याबाबत पालकांना सांगितल्यानंतर बुधवारी (ता. ९) पालकांनी शाळेत एकच गर्दी केली. याप्रकरणी मुख्याध्यापक, शिक्षिका, शिपाई, शाळेचे विश्वस्त यांच्या विरुद्ध लैंगिक अत्याचार प्रतिबंधक कायद्यान्वये गुन्हा दाखल करण्यात आला आहे.

शाळेच्या प्रसाधनगृहात रक्ताचे डाग आढळल्यावरून मुख्याध्यापकांनी सर्व विद्यार्थिनींना सभागृहात बोलावून प्रसाधनगृहाच्या भिंतीवर व लादीवर असलेले डाग प्रोजेक्टरच्या सहाय्याने दाखवले व मासिक पाळी आली असल्याबाबत विचारणा केली. ज्यांना मासिक पाळी आली आहे, त्यांच्या हाताचे ठसे घेण्यास शिक्षकांना सांगितले. तसेच ज्या मुलींना मासिक पाळी आली नाही, त्यांना बाथरूममध्ये नेऊन त्यांची कपडे काढून तपासणी केली. शाळेतल्या शिपाई असलेल्या मावशीने विद्यार्थिनींचे कपडे काढून त्यांचे गुप्तांग तपासले. या संपूर्ण धक्कादायक प्रकाराची माहिती पालकांना मिळताच त्यांनी बुधवारी शाळेत धडक दिली. याप्रकरणी गुन्हा दाखल करण्याच्या मागणीसाठी ठिय्या आंदोलन केल्यानंतर अखेर पोलिसांनी गुन्हा नोंद करत तपास सुरू केला आहे.