भिवंडी, ता. १३ (वार्ताहर) : भिवंडीतील एका यंत्रमाग व्यावसायिकाने कपडा उत्पादनासाठी आवश्यक कच्चा माल, धागा खरेदी करून त्याचे पैसे न देता चार व्यावसायिकांची ३८ लाखांची फसवणूक केली आहे. त्यानंतर त्याने आपला व्यवसाय बंद करून पोबारा केला आहे.
श्याम पेरीवाल असे गुन्हा दाखल झालेल्या फसवणूक करणाऱ्या व्यावसायिकाचे नाव आहे. पद्मानगर येथील आशीर्वाद नगर येथे पेरीवाल यांचे मुंबादेवी टेक्साटाईल फर्मच्या नावाने यंत्रमाग कारखाना होता. त्याने २१ सप्टेंबर ते ९ डिसेंबर २०२४ या दरम्यान मुंबई येथील धागा खरेदी-विक्री करणारे सुरेश जैन यांचा विश्वास संपादन करून त्यांच्याकडून एकूण १० लाख १४ हजार ४५९ रुपयांचा धागा खरेदी केला. हरीशंकर गौरीशंकर चांडक यांच्या जी. एस.अँड सन्स या कंपनीकडूनही १० लाख ८७ हजार ८८ रुपयांचा धागा खरेदी केला होता. शिवप्रिया टेक्सकेमकडून तीन लाख २६ हजार २६४ रुपये रुपयांचा धागा खरेदी करून बिलाचे पैसे परत केले नाही. त्याच दरम्यान उत्तम छगनलाल जैन यांच्या बेबलॉन पॉली टेक्स फर्मकडून १५ लाख ७७५ रुपयांचा धागा खरेदी केला. असे एकूण चार धागा व्यावसायिकांकडून पेरीवाल याने एकूण ३८ लाख ३९ हजार १०२ रुपयांचा धागा खरेदी करून पैसे दिले नाहीत. त्यानंतर स्वतःचा व्यावसायिक गाळा बंद करून पळून गेला. याप्रकरणी सुरेश जैन यांनी दिलेल्या तक्रारी अर्जाची खातरजमा करून भिवंडी शहर पोलिस ठाण्यात पेरीवालविरोधात फसवणुकीचा गुन्हा दाखल करण्यात आला आहे. या गुन्ह्याचा तपास पोलिस उपनिरीक्षक चैताली जाधव करत आहेत.