सोलापूर येथील सौरऊर्जा
प्रकल्पातून वीजनिर्मिती सुरू
महावितरणला होणार वीजपुरवठा
सकाळ वृत्तसेवा
मुंबई, ता. १२ : ज्युनिपर ग्रीन एनर्जीने सोलापूर जिल्ह्यातील चपळगाव येथे तब्बल २१७ मेगावॉट क्षमतेचा सौरऊर्जा प्रकल्प उभारला आहे. त्यामधून प्रत्यक्ष वीजनिर्मिती सुरू झाली आहे. ही वीज पुढील २५-३० वर्षे महावितरणला पुरवली जाणार आहे. या वीज प्रकल्पातील वीज सुमारे तीन रुपये प्रतियुनिट दराने महावितरणला उपलब्ध होणार आहे.

महाराष्ट्र वीज नियामक आयोगाने हरित ऊर्जानिर्मितीला चालना देण्यासाठी वीज वितरण कंपन्यांना आपल्या वीज वितरणाच्या सुमारे २० टक्के वीज अपारंपरिक ऊर्जा प्रकल्पातून घेणे बंधनकारक केले आहे. त्यामुळे महावितरण, अदाणी इलेक्ट्रिसिटी, टाटा पॉवर यांसारख्या सर्वच वीज कंपन्या सौर, पवन ऊर्जा प्रकल्पातून वीज खरेदी करीत आहेत. त्या पार्श्वभूमीवर ज्युनिपर ग्रीन एनर्जीने दोन टप्प्यांत २१७ मेगावॉटचे सौर प्रकल्प उभारले असून त्यामधून प्रत्यक्ष वीजनिर्मिती सुरू झाली आहे.