मलनिस्सारण विभागातील वाहनांची तपासणी करा
मनसेची आयुक्तांकडे मागणी
कल्याण, ता. २२ (वार्ताहर): महापालिकेच्या मलनिस्सारण विभागासाठी ॲकॉर्ड वॉटरटेक इन्फ्रास्ट्रक्चर या ठेकेदार संस्थेला काम देण्यात आले आहे. या संस्थेच्या ताफ्यातील वाहनांची तपासणी तातडीने करण्याची मागणी महाराष्ट्र नवनिर्माण सेनेचे शाखाध्यक्ष गणेश लांडगे यांनी महानगरपालिका आयुक्तांकडे केली आहे. महापालिकेकडून दिलेल्या निविदेनुसार संबंधित संस्थेकडून अनेक वाहने पुरवली जात आहेत; मात्र या वाहनांची वाहतूक विभागाच्या नियमांनुसार आवश्यक कागदपत्रे, नोंदणी पत्रक, विमा यांचा तपास होत नाही, असा आरोप मनसेने केला आहे. अनेक वाहनांची कागदपत्रांची मुदत संपलेली असून, नियमबाह्यरीत्या ती वाहने वापरली जात असल्याचाही आरोप करण्यात येत आहे.

वाहनांची नियमित देखभाल आणि तपासणी अत्यंत आवश्यक असते अन्यथा कार्यक्षमता कमी होते आणि अपघात होण्याची शक्यता वाढते. काही महिन्यांपूर्वी आग्रा रस्त्यावर अपघात होऊन दोन नागरिकांचा मृत्यू झाला होता. त्या वेळीही संबंधित वाहनांची कागदपत्रे अपूर्ण असल्याचे समोर आले होते. या वाहनांची जबाबदारी कुणावर टाकायची, असा प्रश्न लांडगे यांनी उपस्थित केला आहे. त्यांनी असा आरोपही केला की, ठेकेदार अपूर्ण माहिती देऊन महापालिकेची फसवणूक करत आहे, तसेच महापालिकेतील काही अधिकारीही यास हातभार लावत आहेत, हे अत्यंत गंभीर आहे. या पार्श्वभूमीवर, सर्व वाहनांची तातडीने तपासणी करून जबाबदारांवर कारवाई करावी, अशी मागणी लांडगे यांनी आयुक्तांकडे निवेदनाद्वारे केली आहे.