विद्यार्थ्यांसाठी स्वखर्चातून वाचनालयाची निर्मिती
इंटरनेटच्या दुनियेत वाचनाची गोडी वाढवण्यासाठी शिक्षिकेची धडपड
नवीन पनवेल, ता. २२ (बातमीदार) ः इंटरनेटच्या दुनियेत वाचनाची गोडी वाढवण्यासाठी पनवेलमधील एका शिक्षिकेकडून तब्बल दोनशे पुस्‍तकांच्या माध्यमातून मोफत वाचनालयाची निर्मिती करण्यात आली आहे. याचा लाभ शाळेतील विद्यार्थी घेत आहेत.
वाचनाने माणूस समृद्ध होतो, मात्र हल्ली विद्यार्थ्यांसह सर्वांचेच वाचन कमी झाले आहे. त्‍याचे परिणाम अनेक दिवाळी अंक बंद पडले असून, नवीन लेखकदेखील तयार होत नसल्याचे दिसून येत आहे. त्‍यामुळे शालेय जीवनातूनच विद्यार्थ्यांना वाचनाची गोडी लागावी, याकरिता पनेवल येथील महापालिकेच्या श्री गणेश विद्यामंदिर शाळेतील शिक्षिका ज्योत्स्ना भरडा यांनी स्‍तुत्य उपक्रम सुरू केला आहे. त्‍यांनी स्‍वखर्चातून दोनशे पुस्‍तकांची खरेदी केली असून, वाचनालय सुरू केले आहे. वाचनाची गोडी लहानपणापासूनच लागली, तर आयुष्यात पुस्तकांशी मैत्री कायम राहते. आज सर्वत्र बालवयातील मुले मोबाईलच्या सान्निध्यात वेळ घालवताना दिसतात; मात्र त्यांच्या शाळेतील मुले बोधकथा, गोष्टींची पुस्तके आणि बाराखडी पाठांतर करत असल्याने सर्वत्र कौतुकाचा विषय बनले आहेत. शाळेत वाचनालय बनविताना अगदी सामान्य वस्‍तूंचा वापर केला आहे. यामध्ये लाईट फिटींग पट्ट्या, स्प्रिंगचा वापर केला गेला आहे. विशेष म्हणजे विद्यार्थी स्वयंस्फूर्तीने पुस्तकांची देवाण -घेवाण करत आहेत. या उपक्रमाचे शिक्षणाधिकारी रमेश चव्हाण, शिक्षक संघाचे राज्याध्यक्ष अर्जुन कोळी यांनी कौतुक केले आहे.
........................
मोबाईल नको पुस्तक हवे
सध्या सर्वत्र लहान मुलांना मोबाईलचे वेड लागले आहे, मात्र याच मोबाईलमधील कार्टून, मोगली, प्राण्यांच्या कथा, शौर्य कथा, अकबर-बिरबल यासारखे त्यांच्याच आवडीचे पुस्तक शाळेतील वाचनालयात उपलब्ध करण्यात आले आहे. त्‍यामुळे विद्यार्थ्यांना आपोआप पुस्तकांची गोडी वाढू लागली आहे. शिवाय इंग्रजी शब्दांचा संग्रह, बाराखडी, जादूची काठी, मुर्ख गाढवाची गोष्ट यासह अन्य बोध कथा पुस्तकांचा वाचनालयात समावेश असल्याने विद्यार्थी स्वत:च मोबाईलपासून लांब राहू लागल्याचे बोलले जात आहे.
................
कोट
मुलांची आवड लक्षात घेऊन तशी पुस्तके निवडण्यात आली आहेत. त्यानुसार दोनशे पुस्तकांचे वाचनालय सुरू केले आहे. त्या ठिकाणी फावल्या वेळेत विद्यार्थी स्वत:हून जातात. इंटरनेटच्या युगात पुस्तकांशी मुलांची मैत्री कायम राहावी, या उद्देशाने वाचनालय सुरू केले आहे.
-ज्योत्स्ना भरडा, शिक्षिका, श्री गणेश विद्यामंदिर