पालघर (बातमीदार) : जिल्ह्यात गुरुवारी (ता. २४) आणि शुक्रवारी (ता. २५) या दोन दिवसांत पावसाचे प्रमाण वाढून जोरदार ते अतिजोरदार पावसाचा इशारा मुंबई प्रादेशिक हवामान विभागाद्वारे देण्यात आला आहे. जिल्ह्यात शेतीसाठी आवश्यक असलेला पाऊस अजूनपर्यंत पडत नसल्याने शेतकरी हवालदिल झाले आहेत. सलग दाेन दिवस जोरदार व अतिजोरदार पावसाचा इशारा दिल्यामुळे हा अंदाज जर खरा ठरला, तर शेतकऱ्यांची रखडलेली कामे उरकता येतील. हवामान खात्याने इशारा दिल्यामुळे भात पुनर्लागवड पुढे ढकलून भात व नागली रोपवाटिकेतील पाण्याचा निचरा होण्याचे व्यवस्थापन करण्यात यावे, तसेच नवीन लागवड केलेली फळझाडे पाऊस व वादळी वाऱ्यापासून कोलमडून पडू शकतात. त्यामुळे त्यांना काठीचा आधार देऊन बांधावे. जुन्या व नवीन फळबागेतून पाण्याचा निचरा होण्याची व्यवस्था करावी, अशा सूचना जिल्हा कृषी हवामान केंद्र, कोसबाड कृषी विज्ञान केंद्राने केली आहे.