खांदेरी बोट अपघातातील बेपत्ता खलाशांचे मृतदेह सापडले
अलिबाग, ता. २८ (वार्ताहर) : उरण तालुक्यातील करंजा येथून मासेमारीसाठी निघालेली तुळजाई ही बोट शनिवारी (ता. २६) खांदेरी किल्ल्यानजीक समुद्रात लाटांच्या माऱ्यामुळे बुडाली होती. या दुर्घटनेत बोटीवरील आठ मच्छीमारांपैकी पाच जण पोहून किनाऱ्यावर पोहोचले होते; मात्र तिघे बेपत्ता झाले होते, अखेर तब्बल ५० तासांच्या शोधमोहिमेनंतर सोमवारी (ता. २८) सकाळी या तिघांचे मृतदेह सापडले.

नरेश राम शेलार, धीरज कोळी (रा. कासवला पाडा, उरण) आणि मुकेश यशवंत पाटील (रा. करंजा, उरण) अशी मृत मच्छीमारांची नावे आहेत. तिघांचे मृतदेह अनुक्रमे सासवणे, दिघोडे व किहीम किनाऱ्याजवळ आढळल्याची माहिती मांडवा पोलिस ठाण्याचे प्रभारी सहाय्यक पोलिस निरीक्षक सोमनाथ लांडे यांनी दिली.
मनोज गणपत कोळी यांच्या मालकीची तुळजाई नावाची बोट शनिवारी सकाळी करंजा बंदरातून मासेमारीसाठी निघाली होती. खांदेरी किल्ल्यानजीक समुद्रात लाटांच्या जोरदार माऱ्यामुळे बोट उलटली. या वेळी बोटीवरील पाच मच्छीमार हेमंत गावंड (आवरे), संदीप कोळी व रोशन कोळी (करंजा), शंकर भोईर व कृष्णा भोईर (आपटा, पनवेल) हे पोहत किनाऱ्यावर आले होते.