तलवारी नाचवत दहशत माजवणाऱ्याविरोधात गुन्हा दाखल
भिवंडी (वार्ताहर) : मुमताजनगर येथील झोपडपट्टीत तय्यब हॉटेल परिसरात एका माथेफिरूने तलवार नाचवत दहशत पसरवण्याचा प्रयत्न केला. या वेळी झालेल्या झटापटीत एका युवक किरकोळ जखमी झाला. नफीस ऊर्फ तोतला दिलावर खान (वय २४, रा. संजयनगर) हा शनिवारी (ता.२६) रात्री सव्वादहा वाजता हातात लोखंडी तलवार घेऊन तय्यब हॉटेलजवळ सर्वांना घाबरवण्यासाठी शिवीगाळ करू लागला. या वेळी तेथे उभ्या असलेल्या वयोवृद्ध महिलेस मारण्यासाठी तलवार उगारत असताना शरीफ करीम शेख याने महिलेस वाचवण्यासाठी आरोपीच्या हातातील तलवार घेत असताना शरीफच्या उजव्या हाताला तलवार लागून दुखपात झाली. तर फारुख अब्दुल मुद्दूस शहा हा वाद सोडविण्यासाठीमध्ये आला असता त्याच्या उजव्या हाताच्या करंगळीजवळ तलवार लागून दुखपात झाली. या प्रकरणी शरीफ करीम शेख याने दिलेल्या तक्रारीवरून शांतीनगर पोलिस ठाण्यात गुन्हा दाखल करण्यात आला. पोलिस फरार आरोपी नफीस ऊर्फ तोतला दिलावर खान याचा शोध घेत आहेत.