घरांसाठी अतिरिक्त शुल्क
आकारणाऱ्या विकसकांना चाप
सकाळ वृत्तसेवा
मुंबई, ता. २८ : राज्य सरकारच्या धोरणांतर्गत म्हाडाच्या विभागीय मंडळांना २० टक्के सर्वसमावेशक गृहनिर्माण योजनेत खासगी विकसकांकडून मोठ्या प्रमाणात घरे उपलब्ध होतात. त्या घरांची विक्री लाॅटरीच्या माध्यामातून केली जाते. त्यानुसार संबंधित लाॅटरी विजेता घराचा ताबा घेण्यासाठी गेल्यानंतर विकसक मूळ किमतीशिवाय विविध शुल्क आकारतो. त्या पार्श्वभूमीवर म्हाडाच्या सुरक्षा व दक्षता विभागाने परिपत्रक काढत अतिरिक्त शुल्क आकारू नये अन्यथा कारवाई केली जाईल, असे बजावले आहे. त्यामुळे विकसकांच्या मनमानीला चाप लागण्यास मदत होणार आहे.
म्हाडाला खासगी विकसकांकडून मिळालेली घरे लाॅटरीद्वारे विक्री केल्यानंतर संबंधितांकडून विकसकाने म्हाडाने निश्चित केलेली घराची मूळ रक्कम घेऊन घराचा ताबा देणे आवश्यक आहे. दरम्यान, अनेक विकसक इन्फ्रास्ट्रक्चर चार्जेस, ॲमिनिटी चार्जेस, डेव्हलपमेंट चार्जेस, लीगल चार्जेसच्या माध्यमातून अतिरिक्त शुल्क वसूल करतात. त्यामुळे अनेक लाॅटरी विजेत्यांच्या म्हाडाकडे तक्रारी आल्या होत्या. त्याची दखल घेत म्हाडाच्या दक्षता व सुरक्षा विभागाने अशाप्रकारे कोणतेही अतिरिक्त शुल्क न घेण्याबाबत परिपत्रक काढले आहे.