बदलापूर, ता. २८ (बातमीदार) : गणेशोत्सवात कोकणात जाण्यासाठी बदलापूर कोकणवासीयांना थेट बससेवा उपलब्ध झाली आहे. रत्नागिरी सिंधुदुर्ग रहिवासी मंडळाने केलेल्या पाठपुराव्याला अखेर यश आले आहे. परिवहनमंत्री प्रताप सरनाईक यांनी बदलापुरातून एकूण २० बसची सोय करून दिली आहे. यातील १० बस मोफत दिल्या आहेत. त्यामुळे कोकण रेल्वेवर गणेशोत्सवात येणारा प्रवाशांचा ताण कमी होणार आहे; मात्र थेट बदलापुरातून कोकण गाठता येणार असल्याने बदलापूरकर खूश झाले आहेत.
बदलापूर शहरात कोकणातील चाकरमानी मोठ्या प्रमाणात आहेत. शिमगा, गणेशोत्सव, उन्हाळी सुट्टी यासाठी बदलापुरातून हजारो कोकणवासी, कोकण रेल्वेने प्रवास करून गावी जातात. या तिन्ही वेळेत रेल्वेवर प्रवाशांचा मोठा ताण पडत असतो. अनेकांना सर्वसाधारण डब्यातून जीवघेण्या गर्दीतून प्रवास करावा लागतो. यावर उपाय म्हणून यंदाच्या गणेशोत्सवासाठी, बदलापुरात कार्यरत असलेले रत्नागिरी-सिंधुदुर्ग रहिवासी मंडळाच्या वतीने बदलापुरातून थेट कोकणात जाण्यासाठी बस सेवेची मागणी केली होती. मंडळाच्या या मागणीची दखल घेत परिवहनमंत्री सरनाईक यांनी २० फेऱ्यांची सोय करून दिली. या घोषणेनंतर बदलापुरातील कोकणवासीयांनी जल्लोष केला. जास्तीत जास्त बदलापूरकरांनी या सेवेचा लाभ घेण्याचे आवाहन मंडळाच्या अध्यक्षा संगीता चेंदवणकर यांनी केले आहे.

शिवसेनेकडून १० बसची मोफत सेवा!
बदलापूर शिंदे शिवसेना पक्षाकडून २० बस फेऱ्यांपैकी १० फेऱ्या मोफत देण्यात आल्या आहेत. २४ ऑगस्टपासून बदलापूर पश्चिमेकडील आगारातून या बस कोकणात रवाना होणार आहेत. पनवेल, महाड, माणगाव, चिपळूण, राजापूर, मालवण असा बस प्रवास असणार असल्याची माहिती देण्यात आली आहे.